عبدالقدوس

اسلام آباد(رپورٹ ۔دلشاد عظیم)پاکستان پیپلز پارٹی کی چیئر پرسن محترمہ بینظیر بھٹو نے پارٹی کے مذاکرات کاروں کو انتخاب تک حکومت سے بات چیت کیلئے تمام بیک ڈور چینلز بند کرنے کی ہدایت کردی ہے۔ایف آئی اے کے سابق ڈاریکٹر جنرل رحمن ملک اور ان کے ایک ساتھی جو حکومت سے رابطے میں تھے ،دونوں نے دی نیوز کو بتایا کہ اس وقت حکومت سے بات چیت کیلئے کوئی بیک ڈور چینل استعما ل نہیں کیا جارہااور ایسا کوئی ارادہ بھی نہیں ہے۔لیکن انہوں نے انتخابات کے بعد صدر پرویز یا ان کے ساتھیوں سے مذاکرات کے امکان کو مسترد نہیں کیا۔رحمن ملک سے جب دی نیوز نے بات کی تو انہوں نے واضح الفاظ میں کہا کہ پیپلز پارٹی کسی خفیہ مذاکرات کا حصہ نہیں بنے گی اور اب ہر بات عوام کے سامنے ہو گی۔انہوں نے اس تاثر کو یکسر مسترد کر دیا کہ بینظیر بھٹو اے پی ڈی ایم کے رہنماؤں سے براہ راست ملاقات نہ کرنے کی وجہ سے ایک ہفتے سے زائد ملک سے باہر رہیں گی۔انہوں نے واضح کیا کہ محترمہ دو یا تین دن میں واپس آجائیں گی،لیکن واپسی کاشیڈول ابھی طے نہیں ہوا ہے ، انہوں نے کہا کہ ان کی دبئی میں خاندان کے لوگوں سے ملنے کے علاوہ کوئی اور مصروفیات نہیں ہیں۔

__________________