عبدالقدوس

اسلام آباد(جنگ نیوز) صدر پرویز مشرف نے کہا ہے کہ سابق چیف جسٹس انہیں غیر قانونی طور پر ہٹانے کی کوشش کر رہے تھے اور اگر وہ ان کا راستہ نہ روکتے تو ملک مشکل کا شکار ہو جاتا۔ منگل کو ایک عربی ٹی وی چینل کو انٹرویو میں صدر نے کہا کہ اگر سابق چیف جسٹس کو موقع مل گیا ہوتا تو ملک بدامنی کا سامنا کر رہا ہوتا۔ عام انتخابات کے بعد جو بھی سیاسی جماعت اقتدار میں آئے گی وہ اس کے ساتھ کام کرنے کیلئے تیار ہیں کیونکہ وہ لوگوں کے ساتھ خوش اسلوبی سے رابطے رکھتے ہیں اور وہ مصیبت پیدا کرنے والوں میں سے نہیں ہیں۔ فوج کے ساتھ اپنی وابستگی کے بارے میں انہوں نے کہا کہ یہ وابستگی اب بھی قائم ہے مگر براہ راست نہیں۔ فوج انہیں یاد رکھے گی اور وہ مزید کچھ عرصے تک فوج کو یاد رکھیں گے۔ فوج کا کردار ملک کو اندرونی اور بیرونی خطرات سے بچانا ہے۔ انہوں نے کہا کہ وہ امریکہ کی نہیں بلکہ پاکستان کی جنگ لڑ رہے ہیں۔

__________________