محمدعدنان

برازیل میں پولیس ان سات نایاب قسم کے ’البینو‘ گھڑیالوں کی گمشدگی کے متعلق تفتیش کررہی ہے جو یونیورسٹی کے چڑیا گھر سے لاپتہ ہوگئے ہیں۔
ایک گمان یہ ہے کہ شاید انہیں بیرون ملک فروخت کرنے کے لیے چوری کر لیا گیا ہو۔

حکام کے مطابق ایک البینو امریکی گھڑیال کی قیمت تقریباً دس ہزار ڈالر ہے۔اس قسم کے گھڑیال کے جسم پر کالی چتیاں نہیں ہوتیں اور ان کی آنکھیں چمکیلی گلابی رنگ کی ہوتی ہیں۔

جنگل میں رہنے والے ایسے گھڑیال کم ہی بچ پاتے ہیں۔ چونکہ وہ اپنے جلد کے رنگ کے سبب چھپ نہیں پاتے اس لیے ان پر حملہ کرنا آسان ہوتا ہے۔

برازیل کے ٹیلی ویژن ’ گلوبو‘ کے مطابق اس قسم کے سات گھڑیال ماٹوگراسو میں فیڈرل یونیورسٹی کے چڑیا گھر سے غائب ہوئے ہیں۔ نئے سال کے موقع پر انہیں کھانا کھلاتے وقت آخری بار دیکھا گیا تھا لیکن بدھ کو جب اہلکار انہیں دوبارہ کھانا کھلانے پہنچے تو وہ لاپتہ پائے گئے۔

پولیس کا کہنا ہے کہ چڑیا گھر میں کسی بھی طرف سے نقب زنی کا کوئی نشان نہیں ہے۔ یونیورسٹی کے اس چڑیا گھر میں تقریبا آٹھ سو مختلف طرح کے جانور ہیں۔

گمشدہ سفید بھورے رنگ کے مگرمچھ کم عمر کے ہیں اور اب اس چڑیا گھر میں اس خاص قسم کا صرف ایک ہی مگرمچھ بچا ہے۔

پولیس کا کہنا ہے کہ یہ جانور بہت ہی نایاب ہوتے ہیں اور اس کی تفتیش بھی ایک مشکل عمل ہے کیونکہ ان نادر قسم کے جانوروں کی غیر قانونی تجارت بہت خفیہ انداز سے ہوتی ہے۔

جانوروں کے حقوق کے لیے کام کرنے والی تنظیموں کا کہنا ہے کہ دنیا بھر میں جانوروں کی غیر قانونی تجارت دس فیصد برازیل میں ہوتی ہے جہاں سے طوطے اور دیگر پرندے فروخت کے لیے یورپ اور امریکہ بھیجے جاتے ہیں۔

__________________