خرم شہزاد خرم

اے این پی کو ووٹ نہ دیا تو پختون مزید تباہی سے دوچار ہونگے، اسفند یار



کراچی (اسٹاف رپورٹر) عوامی نیشنل پارٹی کے مرکزی صدر سینیٹر اسفند یار ولی نے کہا ہے کہ 18 فروری کے انتخابات میں پختون اے این پی کو کامیاب بنا کر دنیا کو یہ پیغام دیں کہ پختون محبت اور بھائی چارے کو فروغ دینے والی امن پسند قوم ہے۔ اگر پختونوں نے یہ پیغام نہ دیا تو انہیں مزید تباہی سے دوچار ہونا پڑے گا۔ اے این پی لسانیت پر یقین نہیں رکھتی۔ ہم کسی کے ساتھ لڑائی جھگڑا نہیں چاہتے لیکن کسی کی غلامی کرنے کیلئے تیار نہیں ہیں۔ وہ جمعہ کے روز مظفر آباد کالونی لانڈھی میں ضلع ملیر کے زیراہتمام امان خٹک کی صدارت میں منعقد ہونے والے ورکرز اجلاس سے خطاب کررہے تھے۔ اس موقع پر شاہی سید، حاجی محمد عدیل، زاہد خان، افراسیاب خٹک اور امین خٹک نے بھی خطاب کیا۔ اسفند یار ولی نے مزید کہا کہ ہم نے اپنی پچاس سالہ سیاسی جدوجہد میں کبھی بھی قوم کا سر،نگوں نہیں ہونے دیا ہے۔ ہم کبھی کبھی کرپشن میں ملوث نہیں رہے۔ ہم نے ملک میں رہ کر قوم کے حقوق کے حصول کیلئے جدوجہد کی ہے ہم نے ہر آمر کے سامنے کلمہ حق بیان کیا ہے۔ قوم کے حقوق کا سودا کبھی بھی نہیں کیا ہے۔ انہوں نے پختونوں سے اپیل کی کہ وہ انتخابات میں اے این پی کے ساتھ اتحاد کا عملی مظاہرہ کریں اور اپنی بقاء کو یقینی بنائیں۔