عبدالقدوس

ایوان صدر کے اصرار پر گیلانی کی مشرف کے ساتھ اولمپک مشعل کی تقریب میں شرکت
اسلام آباد (دلشاد عظیم ) ایوان صدر اور پرائم منسٹر ہاؤس کے درمیان تعلقات کا اندازہ صدر پرویز مشرف کی اس معصوم خواہش سے لگایا جا سکتا ہے کہ انہوں نے اولمپک مشعل روشن کرنے کی تقریب میں وزیر اعظم یوسف رضا گیلانی کے ساتھ اکٹھے شرکت پر زور دیا ۔ قریبی ذرائع کے مطابق اس خواہش پر تقریب کے شیڈول میں تبدیلی کی گئی کیونکہ پہلے پروگرام کے مطابق صدر او ر وزیر اعظم کو افتتاحی اور اختتامی سیشنوں میں علیحدہ علیحدہ مہمان خصوصی کے طور پر آنا تھا ۔ ذرائع کے مطابق ایوان صدر کی مداخلت پر پروگرام از سر نو اس طرح ترتیب دیاگیا کہ ملک کے دونوں اعلیٰ ترین عہدوں پر فائز یہ شخصیات عالمی اہمیت کے حامل اس ایونٹ پر اکٹھی نظر آئیں۔ تاہم (ن) لیگ کے وفاقی وزیر کھیل خواجہ آصف نے وزیر اعظم گیلانی کو ذاتی طور پر فون کرکے آگاہ کیا کہ صدر پرویز مشرف کی موجودگی میں وہ تقریب میں شرکت نہیں کریں گے ۔ ذرائع نے بتایا کہ ایوان صدر کے اصرار اور صدر پرویز مشرف کی وزیر اعظم کے ساتھ اکٹھے نظر آنے کی خواہش کو حتمی شکل دیئے جانے پر سکیورٹی ایجنسیوں کو بھی پاکستان سپورٹس کمپلیکس میں ہونے والی اولمپک مشعل کو روشن کرنے کی تقریب کے انتظامات پر مجبوراً نظرثانی کرنا پڑی، پہلے سے طے شدہ پلان کے مطابق وزیر اعظم نے افتتاحی اور صدر نے اختتامی تقریب میں بطور مہمان خصوصی شرکت کرنا تھی اور ایجنسیوں نے وی وی آئی پیز کے لئے اپنا پلان بنایا ہوا تھا ۔ ذرائع نے بتایا کہ اگر ایوان صدر نے پہلے سے ترتیب دیئے گئے پلان میں تبدیلی نہ ہوئی ہوتی تو وزیر کھیل خواجہ آصف نے افتتاحی تقریب میں وزیر اعظم کے ساتھ شرکت کرنا تھی ۔ ذرائع کے مطابق سکیورٹی حکام نے ایوان صدر کو بتایا کہ موجودہ سکیورٹی حالات کی وجہ سے دونوں وی وی آئی پیز کو ایک جگہ اکٹھے ہونے سے گریز کرنا چاہئے اور حکام نے ایک مرحلے پر ایوان صدر کو اس سے بھی آگاہ کیا تھا کہ ان کے لئے اولمپک ریلی جیسے موقع پر بیک وقت وی وی آئی پیز کے لئے سکیورٹی انتظام کرنا مشکل ہو جائیگا ۔ ایوان صدر کا اصرار اس حد تک تھا کہ سکیورٹی ایجنسیوں نے سپورٹس کمپلیکس میں دونوں تقریبات کے لئے ہنگامی طور پر انتظامات کئے اورخواجہ آصف نے وزیر کھیل ہونے کے باوجود افتتاحی اور اختتامی تقریب میں پرویز مشرف کی موجودگی کا علم ہونے پر شرکت سے معذرت کی۔ وفاقی کابینہ میں شامل ن لیگ کے وزراء ان تمام تقریبات کا بائیکاٹ کررہے ہیں جن میں صدر پرویز مشرف شرکت کرتے ہیں۔

__________________