عبدالقدوس

پشاور(ایجنسیاں )جمعیت علماء اسلام(ف) کے سربراہ مولانافضل الرحمن نے کہاہے کہ اپوزیشن الیکشن کے بائیکاٹ کی بجائے ایک ایجنڈے پر متفق ہو ۔انہوں نے کہا کہ الیکشن کمیشن نے انتہائی مشکل انتخابی شیڈول دیاہے،ایم ایم اے کی جماعتوں کے درمیان نشستوں کی تقسیم بھی ایک انتہائی مشکل مرحلہ ہوگیا ہے۔انہوں نے کہا کہ اگراپوز یشن میں شامل تمام سیاسی جماعتیں انتخابات کے بائیکاٹ پرمتفق نہیں ہوتیں توکسی ایک یابعض جماعتوں کی جانب سے انتخابات کے بائیکاٹ کے اعلان کاکوئی فائدہ نہیں ہوگا۔یہ باتیں انہوں نے جمعرات کوجے یوآئی کے صوبائی سیکرٹریٹ جامع حادیہ میں صحافیوں سے بات چیت اور ایک انٹرویو میں کہیں۔انہوں نے کہاکہ اپوزیشن جماعتیں انتخابات کے بائیکاٹ کے حوالے سے متفق نظرنہیں آرہیں یہی وجہ ہے کہ اے پی ڈی ایم کے حالیہ اجلاس میں اس حوالے سے کوئی حتمی فیصلہ نہیں ہوسکاجبکہ پی پی پی (پی)کی جانب سے بھی انتخابات کے بائیکاٹ کے حوالے سے کوئی حتمی فیصلہ سامنے نہیں آیا۔مولانافضل الرحمن نے کہاکہ الیکشن کمیشن کی جانب سے انتہائی مشکل انتخابی شیڈول دیاگیا ہے اورسیاسی جماعتوں کیلئے اتنی جلدی نہ صرف امیدواروں کا تعین کرنا مشکل ہے بلکہ مختلف سیاسی جماعتوں کے درمیان سیٹ ٹوسیٹ ایڈجسٹمنٹ اوراتحادقائم کرنے کیلئے بھی وقت نہیں ہے ۔انہوں نے کہاکہ اگران کی جماعت ایم ایم اے کے پلیٹ فارم سے الیکشن میں حصہ لیتی ہے توایم ایم اے کی جماعتوں کے درمیان نشستوں کی تقسیم بھی ایک انتہائی مشکل مرحلہ ہوگی۔انہوں نے کہاکہ ایمرجنسی کی موجودگی میں منصفانہ انتخابات کی توقع نہیں کی جاسکتی تاہم حکومت کوانتخابات ملتوی کرنے کاجوازفراہم کرنابھی درست نہیں ہوگا۔

__________________