خرم شہزاد خرم

اپنی زندگی کو قرآن و سنت کے مطابق گزارا جائے، مولانا الیاس قادری



کراچی (پ ر) امیر اہلسنت علامہ مولانا محمد الیاس عطار قادری نے کہا ہے کہ اپنی زندگی کو قرآن و سنت کے مطابق گزارا جائے۔ الیکٹرانک آلات کی وجہ سے معاشرے میں گناہوں کا سیلاب امڈ آیا ہے افسوس کہ چھوٹے چھوٹے بچے گلی کوچوں میں ناچتے ہوئے نظر آتے ہیں آج مسلمانوں نے اپنے ہی گھروں کو میوزک سینٹر بنایا ہوا ہے جب اللہ عزوجل اور اس کے پیارے حبیب ﷺ کو غفلت کے ساتھ ہنسنا بھی پسند نہیں تو ناچ گانوں کی دھوم کس قدر ناپسند ہوگی۔ ان خیالات کا اظہار انہوں نے دعوت اسلامی کے عالمی مدنی مرکز فیضان مدینہ میں اجتماع سے خطاب کرتے ہوئے کیا۔ امیر اہلسنت کا یہ بیان کراچی کے علاوہ ملک کے دیگر شہروں اور مکہ مکرمہ، مدینہ شریف، عرب امارات، امریکا، کینیڈا، ساؤتھ کیوبا، آسٹریلیا، یونان، بنگلہ دیش، ہندوستان، موزمبیق سمیت کئی ملکوں میں بذریعہ ٹیلیفون ریلے ہوا۔ انہوں نے کہاکہ آج ہم اپنے معمولات زندگی سے فارغ ہوتے ہی لغویات میں مبتلا ہو کر گناہوں میں ملوث ہوجاتے ہیں اور نہ گناہوں سے بچتے ہیں، نہ ہی اللہ عزوجل کی عبادت کا حق ادا کرتے ہیں۔ فلمیں و ڈرامے دیکھنا عام ہوگیا ہے اور لوگ اس کو گناہ تصور نہیں کرتے اور اسے دیکھنے کے لئے طرح طرح کے بے بنیاد جواز پیش کرتے ہیں۔ یاد رکھیں یہ جواز اللہ عزوجل کے عذاب کو نہیں روک سکتے۔ امیر اہلسنت نے کہا کہ اللہ عزوجل چاہے تو بڑے سے بڑے گناہ گار کو معاف فرما دے اور چاہے تو چھوٹے سے چھوٹے گناہ پر پکڑ فرما لے۔ اللہ عزوجل بے نیاز ہے، ہمیں اللہ عزوجل کی خفیہ تدبیر سے ڈرتے رہنا چاہئے لہٰذا اللہ عزوجل کی بارگاہ میں توبہ کریں اور گناہوں سے دور رہتے ہوئے اپنی زندگی کو قرآن و سنت کے مطابق گزاریں۔