عبدالقدوس

انسداد دہشتگردی میں کامیابیاں فوج کی صلاحیتوں کا مظہر ہیں، صدر پرویز
اسلام آباد(نمائندہ جنگ) صدر پرویز مشرف نے کہا ہے کہ دہشت گردی کے خلاف جنگ میں پاک فوج نے اہم کامیابیاں حاصل کیں جو اس کی بہترین پیشہ وارانہ صلاحیتوں کا مظہر ہیں۔ یہ بات انہوں نے چیئرمین جوائنٹ چیفس آف سٹاف کمیٹی جنرل طارق مجید سے ملاقات کے دوران گفتگو کرتے ہوئے کہی۔ ملاقات میں مجموعی ملکی صورت حال اور قومی سلامتی کے معاملوں پر تبادلہ خیال کیا گیا۔ صدر پرویز نے کہ افواج پاکستان کو سہولیات مہیاکرنے کیلئے ہر ممکن اقدامات کئے جارہے ہیں۔ جنرل طارق مجید نے صدر کو مسلح افواج کے سربراہی اجلاس سے متعلق بریفنگ دی اور پاک افغان سرحد اور قبائلی علاقوں میں جنگجوؤں سے نمٹنے کیلئے حکمت عملی سے آگاہ کیا۔ صدر نے کہاکہ عسکریت پسندوں کے بڑھتے ہوئے خطرے سے نمٹنے کیلئے سہ پہلو حکمت عملی کو تیزی سے روبہ عمل لانے کی ضرورت ہے۔ بلوچستان کے گورنر نواب ذوالفقار مگسی نے بھی صدر پرویز مشرف سے ملاقات کی اور بلوچستان کی صورت حال پر بات چیت کی۔ صدر نے کہا کہ تخریب کار عناصر ترقیاتی منصوبوں کو سبوتاژ کرنا چاہتے ہیں تخریبی عناصر کی سرگرمیوں کوسختی سے کچلنا چاہئے۔ گورنر بلوچستان نے صوبے کے مالی مسائل، ترقیاتی منصوبوں اور امن و امان سمیت سیاسی صورت حال پر تبادلہ خیال کیا۔ ذرائع نے بتایا کہ گورنر نے صدر سے درخواست کی کہ وفاقی حکومت ترقیاتی منصوبوں کی تکمیل کیلئے وسائل فراہم کرے کیونکہ صوبے کو مالی مشکلات درپیش ہیں۔ انہوں نے کہا کہ امن وامان کی صورت حال بہتر بنانے کیلئے ممکنہ اقدامات کئے جارہے ہیں۔

__________________