عبدالقدوس

اسلام آباد (نمائندہ جنگ) متحدہ مجلس عمل کی سپریم کونسل نے فیصلہ کیا ہے کہ عبوری آئین کے تحت انتخابات میں حصہ لے گی۔ انتخابی نشان کتاب لیا جائے گا۔ تاہم دیگر سیاسی جماعتوں نے بائیکاٹ کیا تو ان کاساتھ دیا جائے گا امیدواروں کو نامزدگیاں جمع کرانے کی ہدایت کردی گئی ہے قاضی حسین احمدکی سربراہی میں ہونے والے سپریم کونسل کے اجلاس میں طویل مشاورت کے بعد انتخابات میں مشروط حصہ لینے کا فیصلہ کیاگیا ہے۔ مولانا فضل الرحمن نے انتخابات میں حصہ لینے کے حق میں دلائل دیئے جبکہ جماعت اسلامی کی قیادت نے موجودہ حالات میں انتخابات کابائیکاٹ کرنے کی تجویز پیش کی تھی ایم ایم اے کی سپریم کونسل کی طرف سے کوئی اعلان جاری نہیں کیا گیا ہے تاہم ذرائع نے بتایا کہ متحدہ مجلس عمل نے صوبائی انتخابی بورڈز کو ہدایات جاری کردی ہیں کہ وہ کاغذات نامزدگی جمع کرانے کے عمل میں حصہ لے اتحاد میں شامل جماعتوں کی صوبائی قیادت کی مشاورت سے امیدواروں کے ناموں کو حتمی شکل دی جائے اوراپنی سفارشات جلد ا ز جلد مرکزی الیکشن بورڈ کو ارسال کرے۔ اس کے علاوہ امیدواروں کی مناسب رہنمائی بھی کی جائے تا کہ 26نومبر سے قبل تمام حلقوں سے امیدوار کاغذات جمع کرا سکیں۔ متحدہ مجلس عمل کی سپریم کونسل نے فیصلہ کیا ہے کہ اگلے عام انتخابات میں ”کتاب“ انتخابی نشان لیا جائے۔ متحدہ مجلس عمل نے سوات وزیرستان اوردیگر علاقوں میں جاری فوجی آپریشن کی مذمت کی حکومت سے مطالبہ کیا گیا کہ آپریشن فوری طورپرختم کیاجائے اور معاملات کوبات چیت کے ذریعے حل کیاجائے قبائلی علاقوں میں مقامی جرگہ سسٹم کے ذریعے امن قائم کیا جائے۔ ایم ایم اے کے اجلاس میں عام انتخابات کے حوالے سے یہ بھی طے پایا کہ اپوزیشن کی تمام جماعتوں نے انتخابات کابائیکاٹ کیا ان کا ساتھ دیں گے۔

__________________