راجہ اکرام

پاکستان کے صدر آصف علی زرداری نے پیر کو مظفرآباد میں اراکین اسمبلی سے اپنے پہلے خطاب میں کہا ہے کہ اس خطے کا امن کشمیر تنازع کے حل سے مشروط ہے۔ انہوں نے اس یقین کا اظہار کیا کہ کشمیری اپنی جدو جہد میں ضرور کامیاب ہوں گے۔

انہوں نے کہا کہو ’اگر دنیا کی توجہ پاکستان کی طرف ہے تو پاکستان کے ساتھ ساتھ دنیا کو کشمیر کے مسئلے پر بھی ہم سے بات کرنا ہوگی تب ہی اس خطے میں امن آسکتا ہے‘۔

ان کا کہنا ہے کہ ’علاقائی امن کو کشمیر کے امن سے جدا نہیں کر سکتے‘۔

صدر زرداری نے کہا کہ ’ہم نے بھارت اور امریکہ کی دوستی پر کبھی اعتراض نہیں کیا ہے اور یہ کہ ہمیں پتہ ہے کہ ہم اپنے ہمسائے تبدیل نہیں کرسکتے۔ ساتھ میں انہوں نے بھارت کی طرف اشارہ کرتے ہوئے کہا کہ انھیں بھی یہ معلوم ہونا چاہیے کہ وہ بھی اپنے ہمسائے تبدیل نہیں کرسکتے ہیں‘۔

انہوں نے کہا کہ ’بہت جلد وہ وقت آ رہا ہے کہ جب دنیا کی ساری عالمی طاقتوں اور اس خطے کو بیٹھ کر کشمیر کے بارے میں سنجیدہ فیصلے کرنا پڑیں گے اور مجھے امید ہے کہ فتح کشمیریوں کی ہوگی‘۔

انہوں نے کہا کہ بھارتی رہنما یہ سمجھ رہے تھے کہ ’کشمیری قوم کمزور ہے اور وہ فولادی ہاتھوں سے اس قوم کو دبا سکتے ہیں لیکن کشمیری قوم اٹھ کھڑی ہوئی اور اپنی بیٹیاں، بیٹے اور بزرگ قربان کیے اور لاشوں کے انبار لگا دیے اور انہوں نے کشمیر بنے گا پاکستان کا نعرہ ترک نہیں کیا‘۔

آصف علی زرداری نے کہا کہ ’ کشمیری ہمارا خاندان ہیں، ہمارے وجود میں ہیں اور ہماری شہ رگ ہیں اور یہ کہ ہم ان کے حقوق کے لیے جدوجہد کرتے رہیں گے‘۔

انہوں نے کہا ہے کہ’ کشمیریوں پر ہمارا کوئی احسان نہیں ہے بلکہ ان کے حقوق کی جنگ لڑنا ہمارا فرض ہے اور یہ کہ ہم اپنی جانیں تو دیں گے مگر پاکستان یا کشمیر پر کوئی آنچ نہیں آنے دیں گے‘۔

آصف علی زرداری نے کہا کہ’ آمروں نے ہمیشہ (بھارت کو) خوش کرنے کی پالیسی اپنائی لیکن ہم بھارت کے ساتھ مساوی حیثیت میں بات چیت کرنا چاہتے ہیں اور اس میں کشمیری عوام کے حقوق ضرور شامل ہوں گے‘۔

پاکستان کے صدر آصف علی زرداری کا عہدہ سنبھالنے کے بعد پاکستان کے زیر انتظام کشمیر کا یہ پہلا دورہ تھا۔

بی بی سی

__________________
محتاج اصلاح و دعا