خرم شہزاد خرم

امر یکی رپورٹ بڑی جیت ہے،جوہر ی پروگرام جاری رہیگا،ایرانی صدر،ایران ایٹمی پروگرام پر شکوک دور کر ے،بش



تہران،واشنگٹن (جنگ نیوز)ایرانی صدر محمود احمدی نژاد نے کہا ہے کہ ایران کے جوہری پروگرام کے حوالے سے امریکی خفیہ اداروں کی حالیہ رپورٹ ایران کی بڑی جیت ہے جبکہ امریکی صدر جارج بش نے ایران پرزوردیا ہے کہ وہ اپنے ایٹمی پروگرام کے حوالے سے تمام شکوک و شبہات دورکرے۔ تفصیلات کے مطابق ایرانی صدر نے کہا کہ ان کے ملک کا پرامن مقاصد کیلئے جوہری پروگرام جاری رہے گا اور اسے بند نہیں کیا جائے گا۔ ٹیلیویژن پر نشرہونے والے اپنے ایک خطاب میں احمدی نژاد نے کہاکہ امریکی رپورٹ جوہری امور سے متعلق مغربی ممالک کے مقابلے میں ایرانی قوم کیلئے فتح کا اعلان کررہی ہے۔ انہوں نے کہاکہ خدا کی مدد سے ایرانی قوم نے مزاحمت کی،کررہی ہے اور مسئلہ کے خاتمے تک کرتی رہے گی اور تمام مقامات بالخصوص جوہری شعبے میں سرخروہوگی۔ ایرانی صدر نے کہا کہ ایران کو اپنے جوہری پروگرام کیلئے50 ہزار یورینیم سینٹری فیوج کی ضرورت ہے ۔ دوسری جانب امریکی صدر نے ایران سے مطالبہ کیا ہے کہ وہ جوہری ہتھیار بنانے کے حوالے سے اپنی گذشتہ رپورٹ سامنے لائے اور تمام شکوک وشبہات دور کرے۔ انہوں نے کہاکہ ایران عالمی برادری کے سامنے اپنے جوہری پروگرام کے حوالے سے خود کوکلئیرکرسکتا ہے اور اپنے طویل المدتی جوہری پروگرام کو مکمل طورپربند کرنے کی پیشکش قبول کرسکتا ہے نیزعالمی طورپر تنہاہونے سے بچنے کیلئے مذاکرات بھی کرسکتاہے۔علاوہ ازیں پاکستان نے کہا ہے کہ پر امن جوہری ٹیکنالوجی کا حصول ایران کا حق ہے۔ دفترخارجہ کے ترجمان محمد صادق نے کہا کہ پاکستان کا یہ اصولی موقف ہے کہ ایران پرامن مقاصد کیلئے جوہری ٹیکنالوجی حاصل کرے۔ مزید برآں روس نے کہاہے کہ امریکی خفیہ ادارے کی حالیہ رپورٹ ایران پر اقوام متحدہ کی پابندیوں کے خطرے کومزیدکم کرنے میں معاون ہوسکتی ہے۔روسی وزیر خارجہ نے ایران پر زور دیا کہ وہ اپنا متنازع یورینیم افزودگی کا پروگرام روک دے۔