عبدالقدوس

نیویارک (عظیم ایم میاں) امریکی ریاست ویسٹ ورجینیا سے منتخب کانگریس مین نک راحل( Nick Rahall)نے کہا ہے کہ پاکستان امریکہ کا اہم اتحادی دوست مملکت ہے‘ یہ تعلقات دو ملکوں کے درمیان ہیں لہٰذا کسی ایک حکمراں یا شخص کے بعض اقدامات سے ان تعلقات پر منفی اثر نہیں پڑنا چاہئے۔ انہوں نے ’جنگ‘ سے گفتگو کرتے ہوئے ایک سوال کے جواب میں کہا کہ پاکستان کی موجودہ صورتحال مشکل ہے لیکن مستقل نہیں ہے اور اس میں تبدیلی آئے گی‘ ہم امریکہ میں اپنے چیف ایگزیکٹو (صدر) کو اس بات کی ہرگزاجازت نہیں دیں گے کہ وہ سپریم کورٹ کے ججوں کوفائر کرے لہٰذا ہم پاکستان میں بھی انتظامی سربراہ کے ججوں کو ہٹانے کے اقدام کو تسلیم نہیں کرسکتے‘ پاک امریکہ دوستی دو ممالک کے درمیان ہے دو شخصیات کے درمیان نہیں ہے۔ میڈیا پر پابندیوں اور ’جیو‘ ٹی وی کی نشریات کو کیبل سے روکنے کے حکومتی اقدامات کی مذمت کرتے ہوئے کانگریس مین نک راحل نے کہا کہ ہم امریکی تو میڈیا پر ایسی پابندیوں کا نہ تو تصور کرسکتے ہیں اور نہ اجازت دے سکتے ہیں تو پھر اپنے اتحادی دوست ملک پاکستان میں بھی میڈیا کومکمل آزاد اور پابندیوں سے بالاتر دیکھنا چاہتے ہیں‘ امریکہ میں پریس کی مکمل آزادی کی طرح ہم پاکستان میں پریس کی آزادی کے حامی ہیں۔ انہوں نے صدر مشرف کے حوالے سے کہا کہ وہ ایسے اقدامات اور حکمت عملی اختیار کریں جن سے دونوں ملکوں کے عوام کے درمیان تعلقات دوستانہ اور گہرے ہوں‘ وہ میڈیا کو مکمل آزادی دیں اور اسے اپنا کردار ادا کرنے دیں اور شخصی تعلقات کی بجائے پاکستان اور امریکہ کے تعلقات میں وسعت اور گہرائی پیدا کرنے پر توجہ دیں۔

__________________