عبدالقدوس

اسلام آباد(جنگ نیوز) سعودی سفارتخانہ نے سعودی سفیر علی عواض العسیری کے سابق چیف جسٹس افتخار محمد چوہدری کی رہائش گاہ کے دورہ کے حوالہ سے اخبارات میں شائع ہونے والی قیاس آرائی پر مبنی خبروں کی سختی سے تردید کی ہے۔ ہفتہ کو سعودی سفارتخانہ سے جاری وضاحتی بیان میں کہا گیا ہے کہ اس دورے کا مقصد ادائیگی حج کیلئے سعودی حکومت کی دعوت کے حوالہ سے سابق چیف جسٹس کے پروگرام کا جائزہ لینا تھا۔ سعودی حکومت نے جسٹس افتخار محمد چوہدری کو حج کی دعوت اس سال اگست میں دی تھی اور سفیر علی عواض العسیری محض یہ معلوم کرنے گئے گئے تھے کہ آیا جسٹس افتخار چوہدری اب بھی عمرہ یا حج کی ادائیگی میں دلچسپی رکھتے ہیں یا نہیں۔ سابق چیف جسٹس نے گذشتہ سال بھی سعودی حکومت کی اسی طرح کی دعوت پر اپنے اہل خانہ کے ہمراہ حج ادا کیا تھا۔ بیان میں کہا گیا ہے کہ سابق چیف جسٹس کیلئے سعودی حکومت کی طرف سے پیشکش یا حکومت پاکستان کی طرف سے کوئی پیغام پہنچانے کے متعلق قیاس آرائیوں میں کوئی صداقت نہیں ہے۔ بیان میں ذرائع ابلاغ پر زور دیا گیا ہے کہ صداقت سے عاری اس طرح کی بے بنیاد خبروں کو شائع نہیں کیا جانا چاہئے کیونکہ بے بنیاد اور من گھڑت خبروں سے ایک برادر ملک، اس کی قیادت اور عوام کے متعلق منفی تاثر پھیلتا ہے۔

__________________