راجہ اکرام

اسلام آباد . . . برطانیہ کے وزیر خارجہ ڈیوڈملی بینڈ نے کہا ہے کہ پاکستان میں استحکام کیلئے افغانستان میں استحکام ضروری ہے ، ان کا کہنا تھا کہ پاکستان میں دہشت گردی کیخلاف جنگ میں یکجہتی سے عالمی برادری کا اعتماد بڑھا ہے،جبکہ شاہ محمود قریشی نے برطانیہ اور دیگر اتحادیوں کو معیاری اسلحہ فروخت کرنے کی پیش کش کی ہے ۔
دفتر خارجہ اسلام آباد میں وزیر خارجہ شاہ محمود قریشی کے ہمراہ پریس کانفرنس کرتے ہوئے انہوں نے کہا کہ پاکستان اور برطانیہ کے درمیان کئی شعبوں میں مضبوط تعلقات ہیں جبکہ تعلیمی شعبے میں مزید تعلقات بڑھائے جائیں گے، برطانیہ میں ہزاروں پاکستانی طلبا زیر تعلیم ہیں،مزید طلبا کو بھی خوش آمدید کہتے ہیں ۔ برطانوی وزیر خارجہ کا کہنا تھا کہ آئندہ آنے والے دنوں میں کئے جانے والے اقدامات علاقے کے لئے نہایت اہم ہوں گے، برطانیہ نے گزشتہ چار برسوں میں پاکستان کو66 کروڑ پاؤنڈ کی امداد دی ہے ۔ ڈیوڈ ملی بینڈ کا کہنا تھا کہ پاکستانی رہنماؤں سے افغانستان کی صورت حال پر بھی بات ہوئی ہے کیونکہ افغانستان میں قیام امن کے لئے پاکستان کا کردار بنیادی اہمیت کا حامل ہے ۔اس موقع پر وزیر خارجہ شاہ محمود قریشی نے کہا کہ ڈیوڈ ملی بینڈ سے دو طرفہ تعلقات کے فروغ اور دونوں ممالک کے درمیان تجارت بڑھانے پر اتفاق کیا گیا ہے،انہوں نے بتایا کہ پاکستان نے لندن کانفرنس کے اقدامات کا خیر مقدم کیا ہے جبکہ پاکستانیوں کو برطانوی ویزا کے حصول میں حائل مشکلات پر بھی بات ہوئی ہے۔

جنگ۔پاکستان

__________________
محتاج اصلاح و دعا