خرم شہزاد خرم

راولپنڈی(پ ۔ر)سپریم کورٹ بار ایسوایشن پاکستان کے صدر چوہدری اعتزاز احسن نے پمز اسپتال منتقل ہونے سے انکار کر دیا ہے۔انہیں اڈیالہ جیل راولپنڈی میں قید تنہائی میں رکھا گیا ہے۔حکومت نے ان کے پمز اسپتال میں منتقلی کے احکامات جاری کئے تھے لیکن انہوں نے جیل سے باہر نکلنے سے یہ کہہ کر انکار کر دیا کہ جیل میں دیگر قیدیوں کی طرح ان سے بھی جو رویہ اختیار کیا جارہا ہے، وہ ٹھیک ہے۔جیل میں ان سے ملاقات کرنے والی ان کی بیٹی سمن اعتزاز نے مزید بتایا کہ انہوں نے زور دے کر کہاہے کہ ان کی گرفتاری اور مسلسل حراست مکمل طور پر غیر قانونی ہے۔واضح رہے کہ اعتزاز احسن ریٹائرڈ جسٹس وجیہہ الدین احمد کی جانب سے صدر کی نااہلی کیخلاف درخواست دائر کرنے والے وکلا ء پینل کے سربراہ تھے اور وہ پہلے وکیل تھے جنہیں ایمرجنسی کے نفاذ کے بعد اسلام آباد میں پریس کانفرنس کے دوران گرفتار کیا گیا تھا۔

__________________