محمدعدنان

جنگلی جانوروں کے بارے میں کی جانے والی ایک تحقیق میں یہ توقع ظاہر کی گئی ہے کہ اس وقت دنیا بھر میں اسیر شیر ہی اپنی آئندہ نسلوں کے پُرکھ اور اپنی معدوم ہوتی نسلوں کو بچانے میں اہم کردار ادا کر سکتے ہیں۔
شیروں کی افزائش نسل کے جائزے کا نیا طریقہ استعمال کرنے والی ایک ٹیم نے یہ دریافت کیا ہے کہ اسیر شیروں میں کچھ اپنی نسلوں کا خالص جینیاتی ذریعہ ہیں۔

’کرنٹ بائیولوجی‘ میں شائع ہونے والی ایک رپورٹ میں اس ٹیم کا کہنا ہے کہ نسلوں کا یہ تولیدی تنوع اب جنگلوں میں موجود شیروں میں موجود نہیں ہے۔

اس جائزے کے مطابق اب جنگلوں میں صرف تین ہزار شیر باقی بچے ہیں۔

جب کہ محققین کی ایک عالمی ٹیم کے جمع کردہ اعداد و شمار کے مطابق دنیا بھی میں اسیر شیروں کی تعداد پندرہ سے بیس ہزار کے درمیان ہے۔

لیکن ان کا کہنا ہے کہ ان میں سے صرف ایک ہزار شیروں کو ان کی نسلوں کے پروگرام میں شامل کیا گیا ہے۔

ان کی رپورٹ کے مطابق علاقائی اور بین الاقوامی ریکارڈ کے مطابق چڑیا گھروں میں دو ہزار سات کے اختتام تک امور نسل کے تقریباً چار سو اکیس، سماٹریائی نسل کے تقریباً دو سو پچانوے، جنوبی چینی نسل کے تقریباً بہّتر، بنگال نسل کے تقریباً ایک سو اٹھانوے، ہند چینی نسل کے تقریباً چودہ اور ملایائی نسل کے تقریباً ایک سو تیرہ شیر موجود تھے۔

رپورٹ میں کہا گیا ہے کہ ’اسیر شیروں کے کردار کے اس پہلو پر اگرچہ ابھی بحث جاری ہے کہ آیا اسیر شیروں کی آبادی شیروں کی فطری آبادی کا تولیدی ماخذ ثابت ہو سکتی ہے اور آیا اس طرح بچائی جانے والی نسل بقائے نسل کی اقدار کی حامل ہو سکتی ہے‘۔

رپورٹ کے مطابق ’اس مسئلے کا ایک براۂ راست حل اسیر اور جنگلی شیروں کے تولیدی تنوع کو پورے طور پر سمجھ کر ہی تلاش کیا جا سکتا ہے‘۔

گزشتہ بیس سال کے دوران ایک سو پانچ شیروں کے جمع کیے جانے والے ڈی این اے نمونوں سے تحقیقاتی ٹیم نے ایسے تولیدی طریقوں کی نشاندہی کی ہے جن کے ذریعے خالص نسل کی بقا کے لیے مناسب جوڑے بنانا ممکن ہو گا۔

__________________