ابو کاشان

اسلام آباد ۔۔۔۔۔۔۔۔ سپریم کورٹ نے حکم امتناعی کے باوجود پی آئی اے کی بعض ایئرہوسٹس کے ساتھ امتیازی سلوک کرتے ہوئے گراؤنڈ کئے جانے کے خلاف درخواست پر پی آئی اے کے جنرل منیجر ہیومن ریسورس کو شوکاز نوٹس جاری کرتے ہوئے وضاحت طلب کی اور کیس کی سماعت 4 فروری تک ملتوی کردی۔عدالت نے کہا کہ کیوں نہ عدالتی احکامات کی خلاف ورزی پر پی آئی اے حکام کے خلاف توہین عدالت کی کارروائی کی جائے۔ ازخود نوٹس کیس کی سماعت جسٹس محمد نواز عباسی نے کی۔ فاضل عدالت کے روبرو 50 ایئرہوسٹسز کی جانب سے ایڈووکیٹ شیخ ریاض الحق نے پیش ہو کر موقف اپنایا کہ محکمہ نے سپریم کورٹ کے حکم کی خلاف ورزی کی ہے۔ فاضل عدالت نے ایئرہوسٹسز کو فلائنگ ڈیوٹی سے جسمانی نقائص کی بنا پر گراؤنڈ کئے جانے کے خلاف حکم امتناعی جاری کیا تھا لیکن اس کے باوجود محکمہ نے ناہید اظہر و دیگر کو گراؤنڈ کرنے کے احکامات جاری کئے ہیں۔ جبکہ فاضل عدالت نے گزشتہ سماعت پر محکمہ سے رپورٹ بھی طلب کی تھی لیکن فاضل عدالت کے روبرو رپورٹ پیش نہیں کی گئی۔ پی آئی اے کی جانب سے ایڈووکیٹ ارشد علی چوہدری نے بتایا کہ رپورٹ ابھی تک مکمل نہیں ہو سکی۔ فاضل عدالت نے جنرل منیجر کو شوکاز نوٹس جاری کرتے ہوئے مزید سماعت 4 فروری تک ملتوی کر دی۔