ابن جلال

....تفصیلی خبر....
پاکستان پیپلز پارٹی کے شریک چیئرمین آصف علی زرداری نے ملک کے 12 ویں صدر کے طور پر حلف اٹھا لیا
چیف جسٹس عبدالحمید ڈوگر نے عہدہ کا حلف لیا، تقریب حلف برداری میں افغان صدر، قائم مقام صدر، وزیراعظم
وفاقی وزرائ، صوبائی گورنروں، وزراءاعلیٰ سمیت اعلیٰ فوجی و سول حکام نے شرکت کی
اسلام آباد (پاک ڈاٹ نیٹ نیوز) پاکستان پیپلز پارٹی کے شریک چیئرمین آصف علی زرداری نے ملک کے 12 ویں صدر کے طور پر حلف اٹھا لیا، ایوان صدر میں ان سے چیف جسٹس عبدالحمید ڈوگر نے عہدہ کا حلف لیا۔ منگل کی دوپہر ایک بجکر 28 منٹ پر نومنتخب صدر نے اپنے عہدہ کا حلف اٹھایا۔ ایوان صدر کے دربار ہال میں ہونے والی سادہ مگر پروقار تقریب میں افغانستان کے صدر حامد کرزئی نے افغان وفد کے ہمراہ خاص طور پر شرکت کی جبکہ قائم مقام صدر محمد میاں سومرو، وزیراعظم سیّد یوسف رضا گیلانی، قائم مقام چیئرمین سینٹ جان محمد جمالی، سپیکر قومی اسمبلی ڈاکٹر فہمیدہ مرزا، گورنروں، چاروں صوبوں کے وزراءاعلیٰ، وزیراعظم آزاد کشمیر سردار عتیق، چیئرمین جائنٹ سٹاف چیفس آف سٹاف کمیٹی جنرل طارق مجید، بری فوج کے سربراہ جنرل اشفاق پرویز کیانی، پاک فضائیہ کے سربراہ ایئر چیف مارشل تنویر محمود احمد اور بحریہ کے سربراہ ایڈمرل محمد افضل طاہر کے علاوہ صدر آصف علی زرداری کے صاحبزادے اور پی پی پی کے چیئرمین بلاول بھٹو زرداری، ان کی دونوں بہنوں بختاور بھٹو زرداری اور آصفہ بھٹو زرداری، صدر آصف علی زرداری کے والد حاکم علی زرداری، محترمہ بے نظیر بھٹو کی بہن صنم بھٹو، پیپلز پارٹی کے سینئر وائس چیئرمین امین فہیم، جمعیت علماءاسلام (ف) کے سربراہ مولانا فضل الرحمن، عوامی نیشنل پارٹی کے سربراہ اسفند یار ولی خان، ایم کیو ایم کے قومی اسمبلی میں پارلیمانی لیڈر ڈاکٹر فاروق ستار، مسلم لیگ (ن) کے صدر اور وزیراعلیٰ پنجاب میاں شہباز شریف، وفاقی اور صوبائی وزرائ، اعلیٰ عدالتوں کے جج صاحبان، غیر ملکی سفیروں، اراکین پارلیمنٹ اور پیپلز پارٹی کے کارکنوں نے بڑی تعداد میں شرکت کی۔ آصف علی زرداری جب حلف لینے کیلئے دربار ہال میں داخل ہوئے تو بگل بجا کر ان کی آمد کا اعلان کیا گیا اور قومی ترانہ بجایا گیا جس کے بعد سیکرٹری کابینہ ڈویژن نے نومنتخب صدر سے تقریب کے باضابطہ آغاز کی اجازت طلب کی۔ تلاوت قرآن پاک کے بعد چیف جسٹس عبدالحمید ڈوگر نے آصف علی زرداری سے صدر کے منصب کا حلف لیا۔ جیسے ہی حلف مکمل ہوا تو ہال ”زندہ ہے بی بی زندہ ہے اور جئے بھٹو“ کے نعروں سے گونج اٹھا جس پر صدر آصف علی زرداری نے مسکرا کر کارکنوں اور جیالوں کی طرف دیکھا۔ قبل ازیں جب آصف علی زرداری حلف اٹھانے کیلئے دربار ہال میں داخل ہوئے تو شرکاءنے بھرپور تالیوں سے ان کا استقبال کیا جبکہ کارکنوں اور جیالوں نے نعرے لگائے۔ آصف علی زرداری نے شرکاءکو سیلوٹ کیا۔ تقریب کے اختتام پر آصف علی زرداری کو صدر مملکت کا منصب سنبھالنے پر شرکاءنے فرداً فرداً مبارکباد دی۔ بعد ازاں صدر آصف علی زرداری کو تینوں مسلح افواج کے چاق و چوبند دستے نے سلامی پیش کی۔