عبدالقدوس

کراچی (اسٹاف رپورٹر) مصور سیماب ارضم طارق نے کہا ہے کہ آرٹ کے فروغ اور ترویج کیلئے آرٹ گیلریز کی کارکردگی قابل تحسین ہے۔ یہ بات بھی یقین سے کہی جا سکتی ہے کہ ملک میں آرٹ کا مستقبل بہت تابناک اور اطمینان بخش ہے۔ یہ بات انہوں نے یہاں شکیل اسماعیل آرٹ گیلری میں اپنے فن پاروں کی افتتاحی میں کہی۔ اس موقع پر مصور ابرار جی این قاضی، حنیف شہزاد، سعید اختر، رمضان اور عادل صلاح الدین کے علاوہ مصور طارق جاوید بھیموجود تھے۔ مصور سیماب ارضم طارق مصور طارق جاوید کے صاحبزادے ہیں۔ انہوں نے انڈس ویلی اسکول آف آرٹ اینڈ آرٹیکچرل سے گریجویشن اور نیشنل کالج آف آرٹ لاہور سے آرٹ میں ماسٹرز کیا ہے۔ مصور سیماب نے کہا کہ آرٹ کی آگہی اور اچھے تخلیقی کام کیلئے ضروری ہے کہ آرٹسٹ تربیت کے ساتھ ساتھ بہتر تعلیم کے زیور سے بھی آراستہ ہو۔ انہوں نے کہا کہ آرٹ کو پروفیشن بنا کر اس پر انحصار کیاجا سکتا ہے، ماسٹرز کے بعد ابھی تک کوئی جاب نہیں کی۔ مصور شکیل اسماعیل نے کہا کہ سیماب ارضم آرٹ میں مستقبل کا بڑا نام ہے۔ آرٹ میں ایسے ہی پرعزم اور غیر معمولی صلاحیتوں کے مالک آرٹسٹوں کی ضرورت ہے۔ ہم نے بلاامتیاز آرٹ اور آرٹسٹ کی ترویج اور فروغ کیلئے جس عزم سے کام کا آغاز کیا تھا اس پر عمل پیرا ہیں۔ شکیل اسماعیل آرٹ گیلری میں سیماب ارضم کے فن پاروں کی یہ نمائش 28/نومبر تک جاری رہے گی۔

__________________