عبدالقدوس

اسلام آباد (نمائندہ جنگ،ایجنسیاں ) پیپلز پارٹی کی چیئرپرسن اور سابق وزیراعظم بینظیر بھٹو نے کہا ہے کہ راولپنڈی میں جلسہ پروگرام کے مطابق ہو گا۔ انہوں نے اعلان کیا ہے کہ آئین کل تک بحال نہ ہوا تو 13 نومبر کو لاہور سے اسلام آباد لانگ مارچ کرینگے۔ ہم پر حملہ ہوگیا ،پوری قوم باہر نکلے، چند گرفتار ججوں نے رابطہ کیا ہے، آئین کی بحالی پر گرفتار ججز بحال ہوں گے،جنرل مشرف سے ملاقات کی خبریں آئی بی نے پھیلائیں،بحالی جمہوریت کیلئے ایم ایم اے کے ساتھ ملکر چلنے کیلئے تیار ہیں، کارکن اتنی بڑی تعداد میں گرفتاریاں دیں گے کہ حکمرانوں کی جیلوں میں بھی جگہ نہیں رہے گی ۔جمہوریت اور آ ئین کی بحالی کے لئے ایم ایم اے سمیت تمام سیاسی جماعتوں کے ساتھ چلنے کو تیار ہیں ۔ ان خیالات کا اظہار انہوں نے بدھ کے روز پاکستان پیپلز پارٹی کے سینٹرل سیکرٹریٹ میں اے آرڈی کے اجلاس کے بعد نیوز کانفرنس سے خطاب کرتے ہوئے کیا۔دریں اثناء پیپلزپارٹی نے پی سی او کے تحت قومی اسمبلی کے اجلاس کا بائیکاٹ کرتے ہوئے مخدوم امین فہیم کی قیادت میں پارلیمنٹ کے باہر ایمرجنسی کے خلاف احتجاجی مظاہرہ کیا، اس موقع پر پیپلزپارٹی کے کارکنوں نے” مارشل لاء“ نامنظور کے نعرے لگائے، اس موقع پر پولیس نے مظاہرین پر شیلنگ کی اور لاٹھی چارج کیا جس سے ایک خاتون سمیت متعدد افراد زخمی ہوگئے ،ایک خاتون سمیت پیپلزپارٹی کے 7 کارکنوں کو پولیس نے حراست میں لے لیا،اپنی پریس کانفرنس کے دوران بینظیر بھٹو نے کہا کہ ایمرجنسی کا نفاذ واپس لیکر آ ئین بحال کیا جائے جنرل پرویز مشرف قوم ،سپریم کورٹ او رپیپلز پارٹی کے ساتھ کیا گیا وعدہ پورا کریں اور چیف آف اسٹاف آرمی کے عہدے سے ہٹ جائیں بے نظیر بھٹو نے کہا کہ ہمارے وکلاء اور کارکنوں کو جو گرفتار کئے گئے ہیں فوری طور پر رہا کیا جائے انہوں نے کہا کہ ہمارے ساتھ مذاکرات کے تحت جنرل پرویز غیر جانبدارانہ الیکشن کمیشن کا اعلان کریں اور تیسری بار وزیر اعظم بننے پر پابندی کا خاتمہ کریں ۔انہو ں نے کہا کہ یہ تمام اقدامات 9 نومبر سے پہلے پہلے ہونے چاہئیں اگر 9 نومبر تک جنرل پرویز مشرف نے پیپلز پارٹی ، سپریم کورٹ اور قوم کے ساتھ وعدہ پورا نہ کیا تو 13 نومبر سے ملک بھر میں دھرنے دیئے جائیں گے ۔ وہ لاہور جائیں گی اور مشرقی پنجاب سے لانگ مارچ شروع کریں گی اور دھرنے اور لانگ مارچ اس وقت ختم ہونگے جس وقت آئین کو بحال کیا جائے گا ۔ بے نظیر بھٹو نے کہاکہ پیپلزپارٹی 9 نومبر کو لیاقت باغ راولپنڈی میں تاریخ ساز جلسہ کریگی۔ میں عوام سے اپیل کرتی ہوں کہ وہ جرات کے ساتھ اس جلسے میں شامل ہوں اور اپنا حق حاصل کرنے جدوجہد میں شامل ہوں۔

__________________