عبدالقدوس

کمپالا ( جنگ نیوز ) دولت مشترکہ نے دی گئی ڈیڈ لائن تک ایمرجنسی اٹھانے میں ناکامی پر پاکستان کی تنظیم سے رکنیت معطل کردی ہے۔ یوگنڈا کے دارالحکومت کمپالا میں ہونے والے اجلاس میں اس بات کا فیصلہ کیا گیا۔ تنظیم کے سیکریٹری جنرل ڈان میکنن نے بتایا کہ دولت مشترکہ کی وزراء خارجہ کی کمیٹی نے پاکستان میں جمہوریت اور آئین کی بحالی تک رکنیت معطل کردی ہے۔ دوسری جانب برطانوی وزیر خارجہ نے بتایا ہے کہ یہ پابندی کا فیصلہ انتہائی افسوس کے ساتھ کیا گیا ہے تاہم پاکستان کی رکنیت بحالی جمہوریت اور آئین کی بحالی تک معطل رہے گی۔ برطانوی خبر رساں ادارے کے مطابق اس حوالے سے صورتحال کا جائزہ لینے کیلئے دولت مشترکہ کا وفد پاکستان جائے گا اور صدر جنرل پرویز مشرف سے ملاقات بھی کرے گا۔ ڈان میکنن نے کمپالا میں صحافیوں سے بات چیت کرتے ہوئے کہا کہ جنرل مشرف کی جانب سے اٹھائے گئے متنازع اقدامات کو کسی حد تک رول بیک کیا گیا ہے تاہم صورتحال اب بھی دولت مشترکہ کے بنیادی اصولوں کے زمرے میں آتی ہے۔

__________________