عبداللہ حیدر

کلام الٰہی اس لیے نازل ہوا ہے کہ اسے سمجھ کر اس پر عمل کیا جائے۔ اس پر ایمان کا لازمی تقاضا ہے کہ اس کا فہم حاصل کیا جائے۔ بغیر فہم کے مجرد تلاوت کا جواز ان لوگوں کے لیے تو ہو سکتا ہے جو پڑھنے لکھنے سے بالکل محروم رہ گئے ہوں اب تعلیم کی عمر سے بھی گزر چکے ہوں۔ ایسے لوگ اگر صرف تلاوت ہی کر لیں تو بھی غنیمت ہے لیکن پڑھے لکھے لوگ جنہوں نے اپنی زندگیوں کا اچھا بھلا عرصہ کتاب بینی میں صرف کر دیا ہو، دنیا کے بہت سے علوم و فنون حاصل کیے ہوں، مادری ہی نہیں غیرملکی زبانیں بھی سیکھی ہوں، اگر قرآن مجید کو بغیر سمجھے پڑھیں تو عین ممکن ہے کہ وہ قرآن کی تحقیر و توہین اور تمسخرو استہزاء کے مجرم گردانے جائیں۔ الا یہ کہ وہ قرآن کا علم حاصل کرنے کا عزم کر لیں اور اس کے لیے سعی و جدو جہد شروع کر دیں تو درمیانی عرصے میں اگر مجرد تلاوت بھی کرتے رہیں تو امید ہے کہ اس کا اجر انہیں ملتا رہے گا۔
قرآن کا فہم کوئی سادہ اور بسیط شئے نہیں ہے، اس کے کئی مدارج و مراتب ہیں۔ ہر انسان اس سمندر سے اپنی استعداد کے مطابق جتنا اللہ کو منظور ہوتا ہے حصہ پاتا ہے۔ لیکن کوئی کتنی ہی محنت و کاوش کیوں نہ کر لے۔ چاہے پوری زندگی قرآن پر تدبر و تفکر میں بسر کر دے یہ ممکن ہی نہیں کہ کسی بھی مرحلے پر پہنچ کر وہ سیر ہو جائے اور محسوس کرے کہ قرآن کا فہم کما حقہ اسے حاصل ہو گیا ہے۔
قرآن مجید سے مسائل مستنبط کرنا یقینًا علماء کا کام ہے اور عام آدمی کو اپنے محدود علم کے ساتھ ان میں دخل نہیں دینا چاہیے لیکن تذکیر، نصیحت ، آخرت، سبق آموز واقعات اور دل کو جھنجھوڑ کر رکھ دینے والی دوسری آیات کو ہر شخص سمجھ سکتا ہےا ور ان کی زبردست تاثیر سےاس کی زندگی بدل سکتی ہے۔ ایک ایسا آدمی جس نے بی اے اور ایم اے پاس کیا ہو، ڈاکٹری اور انجینرنگ جیسے مشکل علوم و فنون حاصل کیے ہوں، وہ اللہ کی عدالت میں اتنی سی عربی بھی نہ سیکھ سکنے پر کیا عذر پیش کر سکے گا جس سے وہ اس کے کلام پاک کا فہم حاصل کر سکتا۔ عربی زبان کی کم از کم اتنی تحصیل کہ قرآن مجید کا سرسری مفہوم انسان کی سمجھ میں آ جائے۔ ہر پڑھے لکھے مسلمان پر قرآن کو وہ حق ہے جس کی عدم ادائیگی نہ صرف قرآن بلکہ خود اپنے آپ پر بہت بڑا ظلم ہے۔
اس مقصد کے حصول کے لیے چند عملی اقدامات تجویز کیے جاتے ہیں:
1۔ آجکل ایسے مصحف آسانی سے مل جاتے ہیں جن میں لفظی اور بامحاورہ ترجمہ لکھا گیا ہو۔ایسا کوئی مصحف حاصل کر لیں۔ حافظ نذر احمد صاحب کا ترجمہ جو تمام مکاتب فکر (دیوبندی، اہل حدیث، بریلوی) کا متفق علیہ ہے درج ذیل ربط سے اتارا جا سکتا ہے۔ اور ہمارے مقصد کے لیے بہترین چیز ہے۔
Urdu - Understand Quran
2۔ اپنی آسانی کے مطابق آیات کا اتنا ہدف مقرر کر لیں جو آپ آسانی سے ہر روز یا اپنے مقرر کردہ وقت پر پڑھ سکیں۔ شروع میں تین سے دس آیات کا ہدف ٹھیک رہے گا۔ دو تین پارے پڑھ لینے کے بعد روزانہ ایک رکوع پڑھنا زیادہ مشکل نہ ہو گا ان شاء اللہ۔
3۔ محض لغت اور لفظی ترجمے کی مدد سے قرآن کریم کا سمجھنا ناممکن ہے اس لیے کسی متفق علیہ تفسیر کا مطالعہ مفید رہے گا۔ امام ابن کثیر رحمۃ اللہ علیہ کی تفسیر “تفسیر القرآن العظیم” جو عام طور پر “تفسیر ابن کثیر” کے نام سے جانی جاتی ہے اس مقصد کے لیے بہترین ہے۔ درج ذیل ربط سے اتاری جا سکتی ہے
تفسیر کی کونسی کتاب پڑھنی چاہے
4۔ منتخب کردہ آیات کا بامحاورہ ترجمہ پڑھیں، پھر ان کی تفسیر دیکھ لیں۔ اس طرح موضوع آپ کی سمجھ میں آ جائے گا۔ اب لفظی ترجمے سے ایک ایک لفظ کا مطلب ذہن نشین کرنے کی کوشش کریں۔ ہر روز بیس الفاظ کا ترجمہ یاد کر لیں تو چند ہی مہینوں میں قرآنی عربی کا سادہ سا مطلب سمجھنے کے قابل ہو جائیں گے ان شاء اللہ۔
5۔ اللہ کے کلام کو اس طرح سمجھیں جیسے کوئی بچہ سیکھتا ہے۔ باقاعدہ قلم کاغذ لے کر بیٹھنے سے سیکھنے کے عمل میں بہت بہتری آ سکتی ہے۔ ایک لفظ لکھیں پھر اس کا ترجمہ لکھیں۔ اس طریقے سے پانچ پارے آپ نے لکھ لیے تو منزل بہت سہل ہو جائے گی باذن اللہ۔
6۔ یہ حقیقت یاد رکھیں کہ لفظی ترجمے سے قرآن کا مفہوم پایا جا سکتا ہے لیکن اس کا زور بیان، بلاغت اور وہ قوت جو دلوں کو ہلا کر رکھ دیتی ہے اصل متن ہی میں پنہاں ہے۔ لفظی ترجمے میں جملوں کی بے ربطی اور غیرضروری تقدیم و تاخیر محسوس ہو تو بامحاورہ ترجمے سے مدد لیجیے۔ کسی عرب قاری کی آواز میں تلاوت سننے کی عادت ڈالیے۔ عربی صرف و نحو کے بنیادی قواعد سیکھنے کی کوئی صورت نکل سکتی ہو تو ضرور سیکھیے۔
7۔ رمضان کا مہینہ شروع ہونے والا ہے۔ جو اصل میں قرآ ن کا مہینہ ہے۔ اسی ماہ مبارک میں قرآن کا نزول ہوا۔ ارادہ کیجے کہ اگلے رمضان سے قبل آپ خود کو اس قابل بنا چکے ہوں کہ نماز تراویح میں پڑھے جانے والے قرآن کو سمجھ کر سن سکیں۔
اللہ ہم سب کا حامی و ناصر ہو

shafresha

عبداللہ بھائی سلام،
اللہ عزوجل آپ کو اس تحریر پر جزا دے، آمین ثم آمین۔ ۔ ۔ ۔ ۔

عبداللہ حیدر

و علیکم السلام، شاہد بھائی۔ اللہ آپ کی دعا قبول فرمائے اور آپ کو بھی جزا دے
والسلام علیکم

تفسیر حیدر

السلام علیکم
جزاک اللہ خیرا۔
والسلام علیکم

عبداللہ حیدر

و علیکم السلام
و ایاک۔
والسلام علیکم

shafirajput

جزاک اللہ الخیر واحسن الجزاء۔۔۔

اللہ ھمیں قرآن کو سمجھ کے پڑھنے عمل کرنے اور آگے پہچانے کی توفیق۔۔۔

طالبِ دعا

__________________
رب میرا اللہ، دین میرا اسلام، محمد صلی اللہ علیہ وسلم میرے نبی ھیں۔۔۔!!

احمد بلال

میں نے قرآن پاک کو ترجمے کے ساتھ پڑہنے اور ترجمہ یاد کرنے کی کوشش شروع کر دی ہے۔آج دوسرا دن ہے۔ اللہ مجھے مستقل مزاجی کی توفیق دے۔ آمین۔

فیصل ناصر

آمین !

حیدر

دل چاہتا ہے کہ سب کُچھ کہہ دوں
لیکن پھر ڈر لگتا ہے۔
اللہ تو معاف کر دیا کرتا ہے، انسان نہیں کرتے

فیصل ناصر

بول کے کی بورڈ آزاد ہے تیرا

حیدر

جس طرح میرا کی بورڈ آزاد ہے، اُس سے زیادہ ہو سکتا ہے دوسروں کا کی بورڈ رواں ہو۔
اس لیے خاموشی نصف عبادت ہے

احمد بلال

خیر ہے بدر بھائی ؟؟ آپ بتائیں تو صحیح ۔
انسان معاف نہیں کرتے تو نہ کریں اصل معافی تو اسی ذات سے چاہیے۔