مباح

تحریر:‌ پروفیسر ڈاکٹر شبیر احمد خورشید

بلوچستان کے سےاسی افق پرچمکنے والا عظیم ستاراور بلوچستان کا ٹائیگر نواب اکبرخان بکٹی جوہمہ جہت شخصیت کے مالک تھے ۔انہوں نے سارے بلوچستان میں اپنی ایک حیثیت منوائی ہوئی تھی۔ جو بلوچوں کی تاریخ میں اتنے گہرے نقوش چھوڑ کر گئے ہیں کہ جن کو پرویز مشرف جیسے ہزار بد طنیت بھی تاریخ سے کھرچنا چاہیں گے توکھرچ نہ سکیں گے۔

یہ بڑا بلوچ رہنما سر نواب محراب خان بکٹی کے ہاں 1927 میں بلوچستان کے علاقے ڈیرہ بگٹی میں پیدا ہوا۔ جو آکسفورڈ یونیورسٹی لندن سے اعلیٰ تعلیم کی ڈگری لیکر وطن لوٹا تھا۔جس نے لاہور کے ایچی سن کالج میں بھی اچھے طالبعلم کی حیثیت سے وقت گذارا تھا۔ تعلیم سے فراغت کے بعد سول سروسز کا امتحان امتیازی حیثیت سے پاس کیا۔ مگر بیورو کریسی میں ملازمت نہ کی۔ مزاج میں بلوچی انداز کی سختی موجود تھی۔مگر قانون کی عملداری پر یقین رکھتے تھے۔ جس کی مثال میں اپنے ذاتی مشاہدے کی بنیاد پر پیش کرنے جا رہا ہوں۔

بعض سیاسی دوستوں کے ساتھ 1994 میں ڈیرہ بگٹی جانا ہوا۔ جہاں ہم نوا ب محمد اکبرخان بکٹی کے ہی مہمان تھے۔ کوئٹہ میں ہمارا استقبال کرنے کےلئے جمہوری وطن پارٹی جنرل سیکریٹری خدئی نور تشریف لائے ۔ ڈیرہ بکٹی میں نواب صا حب خود ذاتی طور پرہمارے استقبال کے لئے موجود تھے۔ اگلے دن نواب بگٹی نے ہمارے ساتھ دوپہر کا کھانا کھایا۔ اس کے بعد ان کے قلع نما گھر میں ہی ہماری حالات حاضرہ پر گفتگو ہوتی رہی۔اسکے فوراَ ہی بعد ان کے جرگے کا وقت ہونے لگا تو لوگوں نے آ آکر بیٹھنا شروع کردیا۔ دورانِ جرگہ نواب اکبر بکٹی کا بیٹھنے کا ایک خاص اسٹائل تھا۔ جب تک جرگہ جاری رہتا وہ اپنے دونوں پیروں اور کمر کے گرد (پٹکہ)چادر لپیٹ کر بیٹھتے تھے۔جرگہ ختم ہونے کا اعلان اس طرح ہوتا کہ وہ اپنے پیروں اور کمرکے گردکسی چادر کھول دیتے تو لوگ بلا کسی تامل کے اٹھنا شروع ہو جاتے۔کئی چھوٹے موٹے معاملات پر نواب صاحب نے ہمارے سامنے ہی بہترین فیصلے دیے۔ دوران جرگہ ہی کوئی شخص خون میں لت پت زخمی حالت میں نواب بکٹی کی اوطاق میں آیا اور فریاد کی کہ سائیں فلاں شخص نے مجھ پر یہ ظلم کیا ہے۔ اور مجھے مار مار کے لہو لہان کر دیا ہے۔ سردار بگٹی نے برجستہ کہا کہ یہاں کیا لینے آئے ہو؟تھانے جاکر اسکی رپورٹ لکھواﺅ تاکہ تمہیں عدالت سے انصاف مل سکے۔ نواب بگٹی کی اس بات نے میرے اوپرمثبت اثرات مرتب کئے اور اور سرداروں سے متعلق میرے تصور میں تھوڑی تبدیلی پیدا ہوئی۔


اکبر بگٹی 1947 میں جب قائد اعظم سے ملے تو نہایت ہی وضع دار نوجوان تھے۔ اس ملاقت میں انہوں نے قائد اعظم سے بلوچستان کو پاکستان کا حصہ بنانے پر بگٹی قبیلے کی طرف سے رضامندی کا اظہار کیا جس پر قائد اعظم نے نواب کا شکریہ ادا کیا۔ اس بات سے کوئی انکار نہیں کر سکتا کہ جب بعد کے لوگ ماضی کے وعدوں کو فراموش کر دیں تو اختلافات کی خلیج پیدا ہونا اور بڑھنا شروع ہوجاتی ہے اور ہمدردی کرنے والوں کی ہمدردیاں سمٹنا شروع ہوجاتی ہیں۔

1951 میں نواب اکبر بگٹی کو گورنر سندھ و بلوچستان کا مشیر مقرر کیا گیا۔ پھر 1958 میںوہ وفاقی کابینہ میں وزیر مملکت کی حیثیت سے شامل کئے گئے۔ مگر ایوب خان کی ڈکٹیٹر شپ کے زمانے میں 1960میں نواب اکبر بگٹی کے خلاف فوجی ٹرائیل کیا گیا۔ فوجی ٹریبیونل کےذریعے انہیں پابند سلاسل کر دیا اور ان کو کسی بھی حکومتی عہدے کے لئے نا اہل قرار دے دیا گیا۔ جس کی وجہ سے وہ 1970 کے انتخابات میں بھی حصہ نہ لے سکے۔ بھٹو دور حکومت میں14فروری 1973 کو اُس وقت کے بلوچستان کے گورنرغوث بخش بزنجو سے متعلق لندن سازش کیس کی اطلاع ملتے ہی اس وقت کے صدر ذوالفقار علی بھٹو نے صوبائی حکومت توڑ دی جس کے سربراہ وزیر اعلیٰ بلوچستان سردار عطا ءاﷲ مینگل تھے۔ اس کے بعد نواب اکبر بکٹی کو بلوچستان کا گورنر بنا دیا گیا اور بلوچستان میں ایک لاکھ فوجی بھیج دیے گئے۔ جس نے ایرانی ائر فورس کے ذریعے بلوچستان میں قتل و غارت گری شرع کر دی اورکئی ہزاربلوچوں کو موت کی نیند سلا دیا تھا۔ ساڑھے دس ماہ بلوچستان کے گورنر رہنے کے بعد بھٹو کی پا لیسیوں سے شدید اختلافات کے وجہ سے یکم جنوری 1974 کو وہ بلوچستان کے گورنر کے عہدے سے مستعفی ہوگئے۔ بعض لوگوں کا یہ بھی کہنا ہے کہ اس آپریشن کونواب اکبر بگٹی کی حمایت بھی حاصل تھی وقت کی مصلحت کے تحت انہیں ایسا کرنا پڑا۔ کیونکہ وہ پاکستان کے سیاسی اتار چڑھاﺅ پر گہری نظر رکھتے تھے اس کے بعد 1988 میں انہوں نے بلوچستان نیشنل الائینس میں شمولیت اختیار کر لی۔جسکے نتیجے میں وہ 4 فروری 1989 سے 6 اگست 1990 تک بلوچستان کے منتخب وزیر اعلیٰ رہے۔ بلوچ رہنما سے اختلافات کے نتیجے میں بے نظیر بھٹو نے بلوچستان حکومت تحلیل کر دی۔اس طرح وہ اگست 1990 میں مستعفی ہوگئے۔اس کے بعد انہوں نے اپنی الگ جمہوری وطن پارٹی کی بنیاد رکھی جس کے سربراہ وہ خود تھے۔ لہٰذا 1993 کے عام انتخابات میں جمہوری وطن پارٹی بلوچستان کی ایک اہم پارٹی کے طور پر ابھری جس کے پلیٹ فارم سے بگٹی نے قومی اسمبلی کا انتخاب جیتنے کے بعداسمبلی میں بلوچستان کے حقوق پر آواز اٹھاتے رہے۔

بلا شک وشبہہ نواب بگٹی پاکستان کی سیاست میں ایک بڑا نا م تھا۔ بین الاقوامی سیاست کے میدان میں ان کا مطالعہ خاصہ وسیع تھا۔ انہوں نے ساری زندگی بلوچستان کے حقوق کی جنگ لڑی مگر پھر بھی بلوچ عوام کو وہ کچھ بھی نہ دے سکے۔ جو بلوچستان کے حقوق کی بات کرنے والے رہنما کے شایان شان ہرگز نہیں تھا۔ شائد ان کی سرداری اس معاملے میں ان کے آڑے آتی رہی ہو۔ مگر اس بات سے انکار ممکن ہے ہی نہیں کہ وہ بڑے سیاسی رہنما تھے اور بلوچستان کو پاکستان میں شامل کرانے میں ان کابھی اتنا ہی ہاتھ تھا جتنا کہ قاضی محمد عیسیٰ اورمیر ظفر اﷲخان جمالی کا تھا۔

پاکستان کے مجرم اور فوجی ڈکٹیٹرنے بلوچوں کے حقوق کا مطالبہ کرنے پر اور بلوچوں کو حقوق نہ دیے اور سوئی میں کی جانےوالی ایک فوجی کی قبیح حرکت پر پردہ ڈالنے کی غرض سے بلوچستان کے اس شیر کو اس کی کچھار میں ہی 26 اگست2006 کوایک فوجی آپریشن کے ذریعے بھاری بمباری کر کے جاں بحق کر دیا اور پھر انتہائی ڈھٹائی کے ساتھ میڈیا پر آکر اعلان کیا کہ قوم کو مبارک ہو بگٹی کی موت پاکستان کی فتح ہے۔قوم کی آنکھوں میں دھول جھونکنے کے لئے اس نے ایک عجیب شوشہ یہ بھی چھوڑا کہ غار کے خود بخود گرنے سے اکبر بگٹی کی موت واقع ہوئی ہے اور پھر اس حوالے سے حکومتی کارندے روزانہ ایک نہ ایک نیا شوشہ چھوڑتے رہے۔ تعجب اس بات پر ہے کہ جن لوگوں کی زندگیاں نواب بکٹی نے بچائیں تھیں وہ بھی حکومت میں ہوتے ہوئے انکی ظالمانہ موت پر سوائے بغلیں جھانکنے کے کچھ کرتے ہوئے دکھائی نہ دیئے۔ ان کی شہادت سے پہلے انہوں بھی بڑے بڑے نعرے تو بہت لگائے تھے مگر کر کے کچھ بھی نہ دکھایا۔

جس وقت بلوچستان کے شیر کی کچھار ہماری بہادر فوج نے گرائی تو پاکستانی ایجنسیوں نے کہا کہ ان کے پاس سے ایک کروڑ روپے کی پاکستانی کرنسی تھی اور 96 ہزار امریکی ڈالر تھے۔ اس کے علاوہ دو عدد سیٹلائٹ ٹیلیفونز بھی ملے ہیں۔

بلوچستان کے امور پر اتھارٹی سمجھے جانے والے نیوزی لینڈ کے تجزیہ نگار ہال ٹیٹس کا کہنا ہے کہ ”ہٹ دھرمی اور انتقام بگٹی قبائل کے اہم عناصر ہیں“حکومت پاکستان کے ترجمان رازق بگٹی نے اس آپریشن کے بعد کہا تھا کہ ضلع کوہلو میں امن قائم کرنے کے بعد اب مری قبیلے کے باغیوں کی باری ہے۔جس کی وجہ سے بگٹی کے خلاف آپریشن کے چند ہفتوں کے بعد ہی رازق بگٹی بھی انتقاماَ گولیوں کا نشانہ بنا دیے گئے۔ حالانکہ یہ بھی زمانہِ طالبعلمی میں بلوچ حقوق کے لئے بے انتہا جدو جہد کر چکے تھے۔ مگر انتقام نے انہیں بھی زندہ نہ رہنے دیا۔

نواب اکبر بکٹی کی شہادت کے بعد یکم ستمبر 2006 کو بھاری ملٹری کے پہرے میں چند سرکاری لوگوں کی موجودگی میں تین آہنی تالوں سے مقفل اسن کے تابوت کو ڈےرا بگٹی کے ایک قبرستان میں دفن کرا دیا گیا۔ انکے خاندان کے کسی شخص کو یہ اجازت نہ تھی کہ وہ ان کی نماز جنازہ یا تدفین میں شریک ہو سکیں۔ مگر بلوچستان کے ٹائیگر کی سیاسی زندگی کے ملک پراثرات گہرے مرتب ہورہے ہیں۔

نواب بگٹی کے کردار کے حوالے سے بی بی سی نے29 اگست 2006 کو اپنے نشریے میں کہا کہ ”وہ ظالم تھے جابر تھے جلد غصے میں آنےوالے تھے وہ اپنے لوگوں کے خیر خواہ نہیں تھے۔ اپنے عوام کے نام پر حکومت سے ہر سال کروڑوں روپیہ لیکر اپنی جیب میں ڈل لیتے تھے۔ انہوں نے اپنے لوگوں کو جان بوجھ کر پسماندہ رکھا ہوا تھا۔ وہ گرم مزاج ہونے کے با وجود مشاق سیاست داں تھے۔ 2003 سے ہی مری قبائل کے ساتھ مل کر وہ بلوچستان کے لئے کام کر رہے تھے۔ جس کی بنا پر پاکستانی فوج ان کے خون کی پیاسی ہوگئی تھی۔ اسی بنا پر وہ کوہلوکے پہاڑوں میں مہینوں سے روپوشی اختیار کئے ہوئے تھے۔ جہاںانہیں تلاش کرنے کے بعد فوج نے بھاری ہتھیاروں سے گولہ باری کر کے خطرناک بمباری کے ذریعے انہیں لقمہِ اجل بنا دیا“

چاہئیے تو یہ تھا کہ ان سے گفت و شنید کے بعد مسائل کا کوئی حل تلاش کیا جاتا۔مگر ہماری ملٹری بیوروکریسی نہایت سفاکی کے ساتھ اپنے لوگوں کو مارنے میں مہارت رکھتی ہے۔ لوگوں سے بات چیت یہ گولہ بارود کی زبان میں کرتی ہے۔ لوگوں کو باغی بنانا اور بغاوت پر اکسانا تو اس کے بائیں ہاتھ کا کھیل ہے۔ اﷲ میرے ملک کی حفاظت کرے اس ملک میں نفرت کے بیج بونے میں یہ سب سے زیادہ مہارت رکھتی ہے۔ ہماری فوجی اور سول بیورو کریسی جب تک امریکہ کے ہاتھوں خوف اور لالچ کے ذریعے غلام بنی رہے گی اس وقت تک اس ملک میں امن و اتحاد کی فضا قائم کرنا انتہائی مشکل کام ہے۔

آج پوراملک ایک دوسرے سے نفرت اوربد گمانی کی آگ میں جل رہا ہے۔ہر صوبہ مرکز سے دست و گریباں نظر آرہا ہے۔ آبیل مجھے مار کے مصداق ہم نے امریکہ کو خوش کرنے کے لئے اپنے ہی لوگوں کا مسلسل لہو گرانا شروع کیا ہوا ہے۔ اس کام میں ہمارے حکمرانوں کی انتہائی نہ اہلی بھی شامل ہے۔یہ امریکہ کا گیم کھیل کر در در بھیک کا پیالہ لئے پھر رہے ہیں۔مگر انہیں امریکہ کی جنگ کو امریکہ کی جنگ تک کہنے کی ہمت نہیں ہے۔ یہ پاکستان کی خدمت نہیں بلکہ اسکی جڑیں کھوکھلی کرنے میں ہمارے دشمنوں کے ساتھ کھڑے نظر آرہے ہیں۔ جو انتہائی نا معقول بات ہے۔ اس وقت نعروں نہیں عملیت پسندی کی ضرورت ہے۔

بلوچوں ،بلوچستان اور فاٹا کے معاملات کو عقل و شعور سے سلجھانے کی اشد ضرورت ہے۔ پانی سرسے گذرنے سے پہلے بند باندھنے کے شدید ضرورت ہے۔ہمیں تاریخ کا حصہ بننے سے پہلے ہی اپنے معاملات کو سلجھا لینا چاہیئے۔

حیدر

مجھے مندرجہ بالا آرتیکل میں ایک بات واضح نظر آ رہی ہے کہ اس میں پاکستانی افواج کے بارے میں ہمارے ذہن میں "ظالم، خون کے پیاسے، قاتل" وغیرہ تصورات ڈالنے کی کوشش کی گئی ہے۔
دوسری بات یہ کہ انہوں نے بگٹی صاحب کو قانون کا پابند بتلایا۔ مرے شخص کی برائی نہیں کرنی چاہیے۔ لیکن اس مطلب یہ بھی نہیں کہ اسکی برائیوں کو خوبی بنا کر پیش کیا جائے۔ بگٹی صاحب اپنا قانون ہی مانتے تھے۔ وہ جو اللہ کے قانون کو پرانا قانون ٹہرا دیتے تھے وہ کیسے ملکی قانون کو مان لیتے ِ؟ مجھے اس بات کی سمجھ نہیں آئی۔
اور دوسری بات یہ کہ اگر لوگ انکے پاس فیصلہ لینے آتے تھے اور وہ ایک زخمی شخص کو کہ جسکا جھگڑا ہوا تھا، فرما رہے تھے کہ پولیس کے پاس جاو ، یہاں کیا لینے آنے ہو۔ یہ بات کچھ تناقض رکھتی ہے۔
خود سوچیں کہ وہ لوگوں کے مسائل کا فیصل فرما رہے تھے۔اب لوگ انکے پاس یہ مسائل تو لے کر حاضر نہیں ہوتے ہوں گے کہ بگٹی صاحب نماز کیسے پڑھنی ہے، روزہ کے احکام بتائیں۔ وغیرہ۔
لازمی بات ہے لوگ انکے پاس روزانہ کے مسائل لے کر آئیں گے نا۔ تو پھر ایک سے کہنا کہ پولیس کے پاس جاو اور باقی کے مسائل حل کرنا۔۔۔۔۔کچھ Contradictionہے ان دونوں باتوں میں۔ امید ہے آپ لوگ سمجھ گئے ہوں گے میرا اشارہ۔ کہ اس مظلوم شخص نے پہلے کسی واقعہ میں غلطی کر لی ہوگی پولیس کے پاس جانے کی۔جس کو بگٹی صاحب نے دل میں رکھ لیا اور موقع آنے پر بھڑاس نکال لی۔
ایک اور بات یہ کہ مشرف صاحب نے جو کیا وہ اس نے خود بھگتنا ہے اور بگٹی صاحب نے جو کیا وہ انہوںنےبھگتنا ہے۔ لیکن ان دونوں کے کیے کو ہماری قوم بھگت رہی ہے۔ اب مشرف اگر برا تھا تو اسکا مطلب یہ نہیں کہ ہم اس کے مخالف کو اچھا اور حق پر کہنا شروع کر دیں۔ کبھی کبھی دونوں ہی باطل بھی ہوتے ہیں۔

اور باقی مباح صاحب نے درست کہا کہ اس سے پہلے پانی سر پر سے گزر جائے۔ ۔ ۔ ۔ ہم کو سوچ سمجھ لینا چاہیے۔ لیکن ہماری قوم کی بد قسمتی یہی ہے کہ ہم فیصلہ ہی تب کرتے ہیں کہ جب پانی سر پر سے گزر چکا ہوتا ہے

رضی

متفق ہوں اس بات پر ۔

مباح

[QUOTE=بدرالزمان;194161]مجھے مندرجہ بالا آرتیکل میں ایک بات واضح نظر آ رہی ہے کہ اس میں پاکستانی افواج کے بارے میں ہمارے ذہن میں "ظالم، خون کے پیاسے، قاتل" وغیرہ تصورات ڈالنے کی کوشش کی گئی ہے۔
دوسری بات یہ کہ انہوں نے بگٹی صاحب کو قانون کا پابند بتلایا۔ مرے شخص کی برائی نہیں کرنی چاہیے۔ لیکن اس مطلب یہ بھی نہیں کہ اسکی برائیوں کو خوبی بنا کر پیش کیا جائے۔ بگٹی صاحب اپنا قانون ہی مانتے تھے۔ وہ جو اللہ کے قانون کو پرانا قانون ٹہرا دیتے تھے وہ کیسے ملکی قانون کو مان لیتے ِ؟ مجھے اس بات کی سمجھ نہیں آئی۔

جناب بدر صاحب!
کیا آپ نواب اکبر خان بگٹی کو قریب سے جانتے تھے اور اگر جانتے تھے تو مزید انکے بارے میں ہم سب کے علم میں اضافہ کیجیے کہ وہ کن تھے اور کیا تھے؟؟

حیدر

آپ اس سلسلہ میںپاک ڈاٹ نیٹ کے بلوچی فورم میں چپکو ٹاپک "بلوچستان کا آتش فشاں" پڑھ سکتے ہیں۔ نواب اکبر بگٹی سے میری واقفیت تو نہیں تھی لیکن ہمارا خاندان ان کی شادی غمی میں ضرور شرکت کرتا رہا ہے۔ میرے والد صاحب کو وہ اور وہ میرے والد صاحب کو،اسی طرح میرے ماموں سے انکو کچھ کام پڑتے رہے تھے۔ اسی طرح مزاری قبیلہ جن کے ساتھ انکی رشتہ داری بھی تھی اور دشمنی بھی رہی ،میں ہماری اچھی خاصی جان پہچان اور تعلق ہے۔ تو میری معلومات کا ذریعہ وہی لوگ ہیں جو انکو نزدیک سے جانتے اور نزدیک کا تعلق رکھتے تھے۔
رہی میری اپنی بات تو میں ذاتی حیثیت میں نواب اکبر بگٹی کو پاکستان کا غدار نہیں سمجھتا۔