shafresha

بھارتی اداکار عامر خان اپنی فلموں میں‌فلم بینوں کو کوئی نا کوئی پیغام ضرور دیتے ہیں (اُن کی فلم گجنی کے پیغام کے لیئے لوگ اپنے موبائل فون کے اِن بکس کو چیک ہی کرتے رہے مگر وہ نا آیا) ۔

میں‌عموما اُردو فلمیں‌دیکھنے سے دانستاً گریز ہی کرتا ہوں مگر اپنے ایک آفس گولیگ کشور آسمل کے اصرار پر پچھلے دنوں ‌ریلیز ہونے والی فلم 3 Idiots کو دیکھنے کا اتفاق ہوا۔ اُس فلم کو دیکھ کر مجھے ایک شخص کی یاد آ گئی سوچا آپ سے بھی شئیر کیا جائے۔

چناچہ اس بات پر بحث کی جاسکتی ہے کہ کیا ڈگری ہولڈر ہونا کسی کے پڑھے لکھے یا قابل ہونے کی دلیل ہے؟
یا
علم محض درسگاہوں اور مدارس کے ذریعے ہی حاصل کیا جا سکتا ہے؟
یا
کسی ارادے سے سند یافتہ ہونا آپ کے متعلقہ فن میں‌ماہر کا ثبوت ہے وغیرہ وغیرہ

اُس نے ایک غریب گھرانے میں‌آنکھ کھولی تھی۔ اگرچہ گھر میں پیسے کی ریل پیل نا تھی مگر گزارہ باآسانی ہوتا تھا۔ محلے کے دیگر بچوں کی بنسبت اُسے کتابیں اچھی لگتی تھیں۔ نانا کے گھر میں پڑی موٹی موٹی کتابوں‌کی دیکھ کر وہ دلچسپی سے اُنھیں‌اٹھاتا اور جھوٹ‌موٹ پڑھنے لگتا۔

کاغذ اُس کی کمزوری تھا خواہ وہ کسی اخبار کا تراشہ ہو یا کسی رسالے کا ٹائٹل وہ اُسے ایک مرتبہ دیکھتا ضرور تھا۔ اسکول میں داخلے کے بعد اُس کا یہ جنون بڑھتا گیا۔ وہ سب کچھ بہت جلدی پڑھ لینا چاہتا تھا۔ گھر میں‌بھی وہ اپنی کاپیوں پر لکھتا رہتا، کاپیوں کے جلد سیاہ ہونے جانے پر ڈانٹ‌ پڑنے لگی تو اُس نے اپنے بستے میں‌اسکول سے ملنے والے ردی کاغذ بھرنے شروع کردیئے۔ وہ سب سے بے خبر گھر میں‌لگے بیری کے درخت پر بیٹھا کچھ نا کچھ لکھتا یا پڑھتا رہتا۔

دوسری جماعت ہی سے اخبار پڑھنے کے قابل ہوگیا۔ امی سودے کب منگوائیں گی؟ وہ ناشتہ کرکے سوال کرتا۔ محلے کے دُکاندار کے یہاں جنگ اخبار آتا ہے وہ یہ جانتا تھا۔ سودا لینے کے بہانے وہ چھپ چھپ کر اخبار پڑھا کرتا تھا۔طریقہ واردات یہ تھا کہ وہ دُکان سے دور کھڑا ہوکر دُکان پر بھیڑ لگ جانے کا انتظار کرتا اور پھر چپکے سے دُکان کے اندر داخل ہو کر اخبار اُچک لیتا جو عموماً چاول کی کھلی بوری پر رکھا ہوا ہوتا تھا۔ جلد ہی اُس کی یہ چالاکی پکڑی گئی جب دُکاندار نے اُسے تازہ اخبار پڑھتے ہوئے "رنگے ہاتھوں" پکڑ لیا۔
یہ کیا ہے بے؟ دُکاندار اُس پر برسا!
مم مم مہ وہ ممیایا۔ ۔ ۔ ۔ ۔

اُس دن کے بعد کچھ دنوں تک وہ خوف کے مارے دُکان پر نہیں‌گیا۔ پھر کچھ دنوں کے بعد جب دُبارہ جانا ہوا تو تازہ اخبار کو دیکھ کر اُس کی آنکھوں میں‌"تازی ڈبل روٹی"‌گھوم گئی۔ دُکاندار بھی یہ بات بھانپ گیا اور پھر اُس روز اُس کے اور دُکاندار کے درمیان ایک معاہدہ طے پایا کہ جب رش ہوگا تو وہ سامان کے دینے میں‌دُکاندار کی مدد کرے گا اور اُس کے صلے میں‌اُسے اخبار پڑھنے کی اجازت ہوگی، مگر سُرخیوں والا صفحہ پہلے دُکاندار پڑھے گا۔ اُس نے فوراً حامی بھر لی۔ یوں وہ سُرخیوں‌سے پہلے کالم والا صفحہ پڑھتا۔ کالم والے صفحے پر رئیس امرہوی کے اشعار (قطعہ) اُس کی معصوم سمجھ میں‌نہیں آتے تھے، ایک دن اُس نے دُکاندار سے اُن کا مطلب پوچھا، ہا ہا ہا ابے میں‌کیا جانو! اُسے جواب ملا۔

پھر اُس نے یہ اشعار ایک کاغذ پر نوٹ‌کرنا شروع کردیئے۔ وہ یہ اشعار لے کر اپنے اُستاد کی خدمت میں ‌حاضر ہوا تیسری کلاس کے بچے کے ہاتھ میں‌ "ہزار عالم و آدم ہزار خالق و خلق ابھی ہیں عرصہِ تخلیق میں" جیسا مصرعہ کہنے والے شاعر و فلسفی کے اشعار دیکھ کر حیراں ہوئے اور پھر اُس دن سے وہ بچہ اُن کی نگاہوں‌کا مرکز بن گیا۔

وہ ایک گورنمنٹ اسکول تھا، لائیبریری کا کوئی تصور نا تھا۔ پانچویں‌کلاس میں‌اُسے کسی نے بتایا کہ ڈیڑھ گھنٹے کی مُسافت پر ایک لائیبریری ہے جہاں ‌بے شمار کتابیں‌ہیں اور اُنھیں پڑھنے پر کوئی پابندی نہیں‌ہے‌، اچھا! اُس کی نگاہوں کے سامنے سینکڑوں‌ڈبل روٹیاں‌ ناچنے لگیں۔

لائبریری میں‌داخل ہوکر اُس کی آنکھیں کھلی کی کھلی رہ گئیں چاروں طرف قد آدم الماریوں‌کی شیشے سے جھانکتی رنگ برنگی جلدوں میں‌کتابیں اُسے دادی کی کہانیوں کی پریوں‌کی مانند لگیں‌۔
مجھے ایک کتاب چاھیئے اُس نے جھجھکتے ہوئے کہا ، کون سی؟ لائبریریئن نے چشمے کے پیچھے سے جھانکتے ہوئے کہا۔
کوئی سی بھی اُس نے کاندھے اُچکا کر کہا!
میاں‌ پہلے معلوم کرکے کے آؤ کون سی چاھیئے ورنہ وہاں انڈیکس پڑی ہے اُس میں‌دیکھ لو! بوڑھا لائبریریئن منہ ہی منہ میں‌کچھ بڑبڑایا۔
انڈیکس میں‌لگے کارڈز دیکھ کر اُس کا دماغ چکرانے لگا پھر اچاننک اُس کی نظر الف لیلۃ پر پڑھی۔ یہ والی! اُس نے بھاری انڈیکس اُٹھا کر لائبریریئن کے سامنے رکھتے ہوئے اشارے سے کہا۔

الف لیلۃ جانتے ہو اس کا کیا مطلب ہے؟ بوڑھا لائبریریئن چیخا!
ایک ہزار کہانیاں ہیں اس میں‌تم کیسے پڑھو گے؟
اچھا یہ لو اُس نے "عمرو عیار کے کسی کارنامے"‌ کی کوئی کتاب اُس کے سامنے رکھ دی، وہاں سامنے بیٹھ کر پڑھ لو اور دیکھو یہ پھٹے نہیں‌ورنہ پورے پیسے بھرنے پڑیں‌گے، لائبریریئن نے کہا۔

جی وہ حسب معمول ممیایا!
یہ اُس کا لائیبریری سے پہلا رشتہ تھا!


جاری ہے ۔ ۔ ۔ ۔ ۔ ۔ ۔۔

عبیداللہ عبید

نہ معلوم یہ واقعہ حقیقی ہے یاتمثیلی بہر حال اکثرعبقری ( Genius ) لوگوں کوعلم اورمطالعہ کی لت اسی طریقے سے پڑی ہے۔

کبھی موقع ملاتواپنے ایک دوست کاواقعہ تفصیلا شئیر کروں گاجوکبھی سکول کے پیچھے اورمدرسے کے سامنے سے نہیں گزرا۔سوائے ناظرہ کے کسی استاد کامنہ نہیں دیکھالیکن اردواورعربی زبانیں روانی سے لکھ، پڑھ اوربول سکتاہے اورانگریزی زبان اچھی طرح سمجھتاہے لیکن بولنے میں اٹکتاہے۔اس کی استعداد تقریبا یونیرسٹی لیول کا ہے ۔( ذالک فضل اللہ یوتیہ من یشاء )

ایک اچھی شئیرنگ ہے۔اورلائق تحسین ہے ۔

shafresha

عبیداللہ بھائی یہ ایک حقیقی کردار کی داستان ہے جو آج بھی ہمارے آس پاس موجود ہے!

راجہ اکرام

بہت بہترین شاہد بھائی
واقعی قابل تعریف ہے یہ کردار
ویسے وہ کردار خود تو تحریر نہیں کر رہا؟

مزمل فاروق

راجہ بھائی مجھے بھی یہ ہی لگ رہا ہے-

ابو عمار

بہت خوب شاہ فریشہ بھائی، آپ کی تحریریں جکڑ کر رکھ دیتی ہیں۔ بندہ کسی کام کا نہیں رہتا جب تک تحریر پوری پڑھ نہ لے۔

شاہ جی 90

ہمیں تو بے تابی سے بقیہ حصے کا انتظار ہے
اور آپ مانیں یا نہ مانیں ہمیں تو یہ آپ بیتی لگتی ہے
شاہد بھائی تعریف کے لیئے ہمارے پاس الفاظ نہیں ہیں
اللہ کرے زور قلم اور زیادہ

shafresha

دوسرا حصہ

پھرلائیبریری اور اُس کا رشتہ مظبوط ہوتا چلا گیا۔ تقریباً روزانہ ڈیڑھ گھنٹے (یکطرفہ) کی مسافت طے کرکے پہنچتا، جلد ہی لائیبریری میں آنے جانے والے اُسے پہچانے لگے۔ اُس نے جلد ہی دیمک کی سی تیزی سے بچوں کے سیکشن کی ہر قابل ذکر کتاب کو چاٹ ڈالا، حاتم کے قصے، سند باد کے سفر، عمرو کے کارنامے، افراسیاب کے دجل، امیر حمزہ کی شجاعت، اور ملا و پیازہ کی حماقتوں سے اُس کی واقفیت پُرانی ہوچکی تھی، مگر وہ "الف لیلۃ" اپنے نام کی طرح اب بھی پُراسراریت کا لبادہ اُوڑھے اُس کی دسترست سے دور تھی۔

اُس کتاب کو گھر لے جانے کے لیئے اسکول کا شناختی کارڈ ہونا ضروری ہے، بوڑھے لائبریریئن نے اُسے سمجھاتے ہوئے کہا!

سر مجھے اپنا شناختی کارڈ بنوانا ہے! اُس نے ہیڈ ماسٹر کے سامنے کھڑے ہو کر کہا،
ٹھیک ہے اپنی دو تصویریں اور بازار سے کارڈ لے آؤ، جواب ملا!

2 تصویریں کتنے کی بنے گی؟ محلے کے فوٹو گرافر کی دُکان پر کھڑے شخص سے اُس نے پوچھا!
8 روپے کی ! جواب ملا۔
ٓآٹھ روپے، وہ سوچ میں پڑگیا!
چار آنے روزانہ کے حساب سے 32 دن تک جمع کروں تب جا کر جمع ہوسکیں گے، اُس نے دل میں سوچا!
اُس نے والد صاحب اور دادی کے پیروں سے یہ رقم جمع کرنے کا منصوبہ بنایا۔ وہ صبح شام اُن کے پاﺅں دابنے لگا اور 32 دن کا یہ سفر 15 دن میں پورا ہوگیا۔

اپنی کارٹون نما تصویر لے کر جب وہ ہیڈ ماسٹر صاحب کے کمرے میں پہنچا تو وہ تصویر دیکھ کر ہنس پڑے۔ یہ کس کی تصویر ہے؟ اُنہوں نے تمسخرانہ لہجے میں پوچھا!
یہ میں ہوں سر! وہ پھر سے ممیایا!
اگلی صبح وہ کارڈ کے ہمرا لائبریری پہنچا، خوشی سے اُس کے پاؤں زمین پر نہیں ٹک رہے تھے۔
لائبریریئن کے کاؤنٹر پر کارڈ رکھ کر اُسے کچھ کہنے کی ضرورت پیش نہیں آئی۔

بڑی جلد کی قریباً 1500 صفحات پر مشتمل یہ کتاب لے کر چلنا اُس کے لیئے مشکل ہوگیا تھا، وہ کبھی اُسے سر پر رکھتا تو کبھی دائیں اور کبھی بائیں بغل میں دبتا ہوا گھر پہنچ ہی گیا۔
کسی انڈیئن اشاعتی ادارے کی چھاپی ہوئی اس کتاب میں کہیں کہیں رنگین تصاویر بھی تھیں۔
گھر کے دیگر بچے حیرت سے اس ضخیم کتاب کو دیکھ رہے تھے۔
اُس رات اُس نے جلتی ہوئی انگیٹھی کے پاس بیٹھ کر اُس کہانی کو پڑھنا شروع کیا اور آج تک شہرذاد کی زبانی زندگی کی الف لیلۃ سُن رہا ہے۔

اسکول کا وقت دوپہر بارہ بجے سے شام ساڑھے چار بجے تک تھا!
یوں صبح میں لائیبریری جا نے کا وقت مل جاتا تھا۔ لائیبریری میں صبح کے وقت بوڑھے اور ریٹائرڈ لوگوں کی آمدو رفت ذیادہ ہوتی تھی۔ وہ اپنے درمیان ایک کم سن لونڈے کو دیکھ کر حیران ہوتے تھی پھر یہ حیرانگی رفاقت میں تبدیل ہوچلی گئی ۔ کسی کو پان منگوانا ہو یا کسی کو قریبی بینک میں بل جمع کروانا ہو یاکسی کو اپنی وھیل چئیر پر دھکا لگوانا ہو تو اُسے ہی آوز دیتے۔ بوڑھے لائبریریئن کی چائے کا ایک مختصر حصہ بھی اُسے کبھی کبھی مل جاتا۔
کیا میں ان کی مٹی صاف کردیا کروں ؟ اُس نے لائیبریری کے پچھلے حصے کی طرف اشارہ کرتے ہوئے کہا۔
یوں وہ جب پڑھتے ہوئے سستانا چاہتا تو کپڑا لے کر کتابوں کی گرد صاف کرنے لگتا۔اُس گرد کی خوشبو اُسے کسی مصری مقبرے کی ہزاروں سال قدیم خوشبو کی سی لگتی۔

جلد ہی زندگی میں ایک تبدیلی رونما ہوئی وہ یہ کے پانچویں کلاس پاس کرلینے کے بعد چھٹی کلاس کے نئے کورس میں انگریزی کی کتاب بھی شامل نصاب تھی۔

ابو عمار

لو جی ہُن فر انتظار کریے۔ یار ایک ہی مرتبہ لکھ دیں قسم سے پوری پڑھے بغیر نہیں اُٹھیں گے۔

shafresha

آپ تو فی الحال گھر پر آرام کررہے ہیں نا!

چلیئے اس پر اپنی رائے دیجیئے:
وہ کاغذ کی کشتی! "چھٹا حصہ"

ابو عمار

آپ اندازہ کرسکتے ہیں کہ چکن پاکس میں بندہ کس طرح آرام کرسکتا ہے

یحیٰی

اچھا لکھا ہے شاھد بھائی

حسنین ایوب

بہت خوب بقایا قصے کا انتظار ہے

محمدعدنان

واہ شاہد بھائی
ماشاءاللہ بہت ہی خوبصورت انداز میں بیان کیا ہے آپ نے
اللہ آپ کے قلم کو مزید طاقت دے
لکھتے رہا کریں
اس کالم کے بقیہ حصے کا انتظار رہے گا

__________________

shafresha

عدنان بھائی "http://www.itgarden.pak.net" تو ایرر دے رہا ہے!