راجہ اکرام

ویسے تو تمام ہی انبیاءکرام علیہم السلام معصوم اور قابل تقلید تھے لیکن بعض کو جو درجہ اور مقام حاصل ہوا وہ رہتی دنیا تک کے لیے کامیابی کا ضامن ہے۔ اسی فرق مراتب کو بیان کرتے ہوئے قرآن کریم میں ارشاد ہوا ”تلک الرسل فضلنا بعضہم علی بعض“ کہ ہم نے بعض رسولوں کو بعض پر فضیلت عطا کی ہے۔ افضل ترین اور الوالعزم انبیاءمیں ابراہیم علیہ السلام کو خاص مقام حاصل تھا۔ انہوں نے جن حالات میں جن آزمائشوں سے مقابلہ کرتے ہوئے ثابت قدمی اور استقامت کا مظاہرہ کیا وہ آج کے حالات میں ہمارے لئے بہترین مشعل راہ ہے۔

آخر وہ کیا عمل تھا اور وہ کیا طریقہ کار تھا جس پر چل کر سیدنا ابراہیم کو یہ مقام ذی شان حاصل ہوا؟ اور وہ کیا سنتیں انہوں نے چھوڑی ہیں کہ سنت ابراہیمی کو زندہ رکھنے کے لئے ہر سال مسلمانوں کو قربانی کا حکم ملا ،حج بیت اللہ فرض ہوا اور سیدہ حاجرہ کی یاد میں صفا و مروة کے درمیان سات چکر لگانے کو لازمی قرار دیا گیا؟ اس فلسفے کو سمجھنے کے لئے سیدنا ابراہیم علیہ السلام کی حیات پر اک نظر دوڑانی پڑے گی۔

سیدنا ابراہیم علیہ السلام ایک بت ساز اور بت فروش کے گھر میں پیدا ہوئے، اور یہ کوئی معمولی پیشہ نہ تھا۔ پتھروں کو خدا بنانے کا کام یقینا اپنے وقت کا اہم ترین اور معزز ترین پیشہ ہوگا۔ اور اس پیشے کی وجہ سے آزر اور اس کے خاندان کو معاشرے میں عزت کی نگاہ سے دیکھا جاتا ہوگا۔ ہر باپ کی طرح آزر کی بھی یہی خواہش تھی کہ اس کا بیٹا بھی یہ کام سیکھ لے، اور مستقبل میں جانشینی کے فرائض سر انجام دیتے ہوئے خاندان کے اس شرف کو برقرار رکھے۔ لیکن ” تدبیر کنند بندہ تقدیر کنند خندہ“ ۔

اسے کیا علم تھا کہ جسے وہ بت ساز اور بت فروش بنانے کا سوچ رہا ہے وہ تو بت شکن بنے گا۔ نہ صرف مٹی کے بت بلکہ وہ معاشرے میں بنے ہوئے ہر بت کو پاش پاش کرنے کے لئے آیا ہے چاہے وہ بت خوف غیر اللہ کا ہو، چاہے وہ بت انسانوں کی خدائی کا ہو یا خاندانی تفاخر کا ہو۔ اور آپ نے اپنی زندگی میں یہ سب کر دکھایا، ہر بت کو پاش پاش کیا اور اسباب کے بجائے مسبب الاسباب پر یقین و ایمان کی درخشاں مثالیں پیش کیں ۔

آپ علیہ السلام کی زندگی یوں تو ساری کی ساری قابل تقلید ہے، اس پر چل کر کامیابی کا حصول یقینی ہے لیکن اگر ہم اس فسلفہ حیات کو تلاش کرنا چاہیں جس کے باعث آپ کے زندگی کو سنت قرار دے کر رہتی دنیا تک کے لئے کامیابی کی ضمانت اور مشعل راہ بنا دیاگیا تو وہ ہے ” معمولات زندگی میں فکر و تدبر اور عقل کا استعمال لیکن جب حکم خداوندی آ جائے تو بلا چوں و چراں سر تسلیم خم کر دینا“۔

ابتدا ءہی فکر و تدبر سے ہے۔ تارا دیکھا ، چاند دیکھا، سورج دیکھا، یہی سمجھا کہ بس یہی رب ہیں لیکن جب انہیں غروب ہوتے اور زوال پذیرہوتے دیکھا تو سوچا کہ وہ کیسے رب ہو سکتا ہے جو خود ڈوب جائے۔ بلکہ ضرور کوئی ہے جو اس کائنات کو چلا رہا ہے اور سب اس کے حکم کے پابند ہیں۔

پھر دیکھئے بت شکنی کا کا م سر انجام دینا تھا، اپنے آپ کو بیمار بنایا۔ جب سب چلے گئے تو سارے بت توڑ کر کلہاڑی بڑے بت کی گردن پر لٹکا دی اور پوچھنے پر فرمایا کہ ”یہ تو ان کے بڑے نے کیا ہے“۔ مقصد ان کو یہ باور کرانا تھا کہ جو خود اپنی حفاظت نہیں کر سکتے، مکھی تک نہیں اڑا سکتے اور بول نہیںسکتے وہ کیسے الوہیت اور ربوبیت کے درجے پر فائز ہو سکتے ہیں؟۔

بادشاہ کے ساتھ تاریخی مکالمہ دیکھ لیجئے۔ جب بادشاہ نے زندگی اور موت کا اختیار اپنے پاس ہونے کا دعوی بھی کر دیا اور دو اشخاص میں سے ایک کو مارنے اور دوسرے کو زندہ چھوڑنے کا حکم دے کر بظاہر سیدنا ابراہیم علیہ السلام کو لا جواب کرنے کی کوشش کی تو آپ نے فرمایا کہ ’میرا رب تو مشرق سے سورج نکالتا ہے ، اگر تو خدائی کا دعوے دار ہے تو سورج کو مغرب سے طلوع کرکے دکھا‘۔ ”فبھت الذی کفر“ کافر بادشاہ حیران و پریشان رہ گیا ۔

اس طرح کے بے شمار واقعات سیدنا ابراہیم علیہ السلام کی زندگی میں ملتے ہیں جہاں تلاش حق کی جستجو اور فکر و تدبر کا استعمال نہایت ہی بہترین انداز میں ملتا ہے۔ لیکن کمال یہ ہے کہ اس صلاحیت کو رب کی دین ہی سمجھتے ہیں،اور جب کسی حوالے سے رب کا حکم آ جائے اطاعت وفرمانبرداری کے ایسے باب رقم ہوتے ہیں کہ تاریخ مثال پیش کرنے سے قاصر ہے، عقل کا استعمال کر کے تاویلیں اور حیلے تراشنے کے بجائے ’بے خطر آتش نمرود میں عشق‘ کا منظر پیش کیا۔
بڑھاپے میں عطا ہونے والے فرزند اور شریکہ حیات کو بے آب و گیاہ صحرا میں چھوڑنے کا واقعہ ہو یا اپنے ہی بیٹے کو اپنے ہی ہاتھوں سے خدا کے لئے ذبح کرنے کا حکم، یا پھر نار نمرود میں کودنے کا مرحلہ۔ بلا چوں و چراں اس طرح سر تسلیم خم کر دیا کہ”عقل ہے محو تماشا لب بام ابھی“۔

آج جب ہم ہر طرف سے آتش نمرود میں گھرے ہوئے ہیں، تمام عالم کفر ملة واحدہ کی صورت مسلمانوں پر پل پڑا ہے، صرف مسلمان ہونے کے جرم کی پاداش میں ظلم و ستم کے وہ پہاڑ توڑے جا رہے ہیں کہ الامان و الحفیط۔ ان حالات میں سنت ابراھیمی ہی وہ لائحہ عمل اور وہ راہ نجات ہے جس پر عمل کر کے حالات میں بہتری لائی جا سکتی ہے۔

آج بھی ہو جو ابراہیم کا یمان پیدا
آگ کر سکتی ہے انداز گلستاں پیدا



۔

__________________
محتاج اصلاح و دعا

shafresha

السلام علیکم،
حضرت ابراھیم کے والد کے "مومن" نا ہونے پر علماء‌کا اختلاف ہے۔ قرآن میں‌ "اَب" باپ کے علاوہ چچا کے لیئے بھی استعمال ہوا ہے۔ یہ ایک اختلافی مسئلہ ہے لہذا اس پر کوئی حتمیٰ نہیں دینی چاھیئے!

واللہ اعلم!

عامرشہزاد

ماشاء اللہ بہت اچھی تحریر ہیں

راجہ اکرام

آپ نے درست توجہ دلائی
لیکن میری معلومات کے مطابق یہاں لفظ ’اب‘ باپ معنی میں زیادہ راجح ہے، اور ظاہر نص بھی اسی کی مؤید ہے۔
اور جو یہاں اب سے مراد باپ نہیں لیتے وہ تایا ابو لے لیں ۔۔

ھذا ما عندی و اللہ اعلم بالصواب و ھو ولی التوفیق

نیلم خان

اچھی تحریر ہے ۔

منتظمین

سرورق کے لیے پیش کریں۔

ام طلحہ

بہت اچھی تحریر ہے راجہ بھائی!!
جزاک اللہ

wajee

شاباش بہت خوب
۔۔۔۔۔۔۔۔۔۔۔۔۔۔۔

عدنان دانی

بہت خوب راجہ بھائی
بہت اچھی تحریر ہے۔۔۔۔۔۔۔۔۔۔۔

گوندل

اللہ تعالیٰ انبیا کے تقدس اور پاکیزگی کا خیال ان کی پیدائش سے پہلے بھی رکھتا ہےاور ان کے نسب کی بھی حفاظت کرتا ہے۔ اکثر مفسرین کا خیال ہے کہ بت پرست آذر حضرت ابراہیم کے والد نہیں تھے۔

__________________
عابد

shafresha

علماء‌ اہلسنُت و الجماعت کی ایک بڑی جماعت کے موقف کے مطابق اللہ عزوجل انبیاء کے نسب کی تطہیر کی حفاظت بھی فرماتا ہے تاکہ غیر مسلموں کی جانب سے کسی بھی قسم کی طنعہ و تشنیع کا امکان باقی نا رہے!
گوندل بھائی آپ کے ریمارکس کا شکریہ!

بزم خیال

جزاک اللہ
اکرام بھائی بہت اچھی تحریر ہے اللہ تبارک تعالی ہمیں ایمان کی قوت عطا فرمائے آمین

راجہ اکرام

سیدنا ابراھیم علیہ السلام کے والد کی مذہبی حیثیت علماء و مفسرین کے ہاں مختلف فیہ ہے، اور اس کی وجوہات ہیں۔
پہلا مسئلہ تو یہ ہے کہ آزر کون تھا؟
بعض کے ہاں یہ ایک بت کا نام ہے اور ابراھیم علیہ السلام کے والد کا نام تارح تھا جیسا کہ کتاب مقدس بھی ذکر کرتی ہے۔ لیکن ایک رائے یہ ہے کہ آزر ہی ابراھیم علیہ السلام کا والد تھا جیسا کہ قرآن کریم نے کہا ہے۔ اور تارح کا جواب یہ دیا جاتا ہے کہ یہ لقب یہ دوسرا نام ہو سکتا ہے جیسا کہ اسرائیل یعقوب علیہ السلام کے ساتھ ہے۔

دوسرا مسئلہ ہے کہ ان کی مذہبی حیثیت کیا تھی؟ وہ مسلمان تھے یا مشرک؟
اس میں بھی دو آراء ہیں۔
ایک رائے یہ ہے کہ اللہ تعالی انبیاء کے انساب کی تطہیر کرتا ہے اس لئے کسی نبی کے نسب میں کوئی فرد مشرک نہیں ہو سکتا۔ اس حوالے سے نبی کریم صلی اللہ علیہ و سلم کی ایک حدیث بھی نقل کی جاتی ہے کہ ’’وما زلت أنتقل من أصلاب الطاهرين إلى أرحام الطاهرات ‘‘ یعنی آپ علیہ السلام کے نسب میں تمام ہی افراد پاکیزہ ہیں۔ تو ابراھیم علیہ کے والد مشرک کیسے ہو سکتے ہیں کیوں کہ قرآن خود کہتا ہے کہ ’’انما المشرکون نجس‘‘ کہ مشرک تو نجس ہوتے ہیں۔
بات دل کو لگتی ہے لیکن اس حدیث کا مجھے کوئی مصدر نہیں مل سکا اور اسے کے مقابلے جو دوسری حدیث ہے دوسرے قول کی تائید میں اسے امام بخاری نے اپنی صحیح میں نقل کیا ہے اس لئے اس کی صحت زیادہ یقینی ہے۔
اور قرآن کریم میں جہاں ذکر ہے کہ ’’وَإِذْ قَالَ إِبْرَاهِيمُ لِأَبِيهِ آَزَرَ أَتَتَّخِذُ أَصْنَامًا آَلِهَةً إِنِّي أَرَاكَ وَقَوْمَكَ فِي ضَلَالٍ مُبِينٍ‘‘ ابراھیم علیہ السلام نے اپنے والد آزر سے کہا ۔۔۔۔۔۔۔۔۔۔۔۔۔۔۔۔۔ یہاں لفظ ’اب‘ حقیقی باپ کے لئے استعمال نہیں ہوا بلکہ آزر آپ کے چچا تھے، اور لفظ ’’اب‘‘ کو باپ کے علاوہ چچا کے معنی میں استعمال کے لئے بھی قرآن کریم ہی سے استدلال کیا گیا ہے۔ مثال کے طور پر جب سیدنا یعقوب علیہ السلام نے اپنے بیٹوں سے پوچھا کہ ’’مَا تَعْبُدُونَ مِنْ بَعْدِي‘‘ میرے بعد کس کی عبادت کرو گے؟ تو بیٹوں نے جواب دیا ’’ نَعْبُدُ إِلَهَكَ وَإِلَهَ آَبَائِكَ إِبْرَاهِيمَ وَإِسْمَاعِيلَ وَإِسْحَاقَ إِلَهًا وَاحِدًا وَنَحْنُ لَهُ مُسْلِمُونَ ‘‘ کہ ہم عبادت کریں گے آپ کے الٰہ کی اور آپ کے آباء ابراہیم اور اسماعیل اور اسحاق کے الٰہ کی ۔۔۔۔۔ تو یہاں اسحاق علیہ السلام تو یعقوب علیہ السلام کے والد تھے اور ابراھیم علیہ السلام دادا ہونے کے ناطے ’اب‘ کے مفہوم میں آ گئے جبکہ سیدنا اسماعیل علیہ السلام تو چچا تھے اور ان کے لئے بھی لفظ ’اب‘ استعمال کیا گیا۔ لہذا آزر کو جہاں بھی ’اب‘ کہا گیا ہے وہ حقیقی وہاں حقیقی والد مراد نہیں ۔۔

دوسرے قول کے قائلین جن کے خیال میں آزر ہی ابراھیم علیہ السلام کے والد تھے اور وہ غیر مسلم تھے اور اسی حالت میں وفات پائی ان کے دلائل مندرجہ ذیل ہیں۔
1۔۔ وَإِذْ قَالَ إِبْرَاهِيمُ لِأَبِيهِ آَزَرَ أَتَتَّخِذُ أَصْنَامًا آَلِهَةً إِنِّي أَرَاكَ وَقَوْمَكَ فِي ضَلَالٍ مُبِينٍ
یہاں لفظ ’اب‘ حقیقی باپ کے معنی میں استعمال ہوا ہے اور آزر چونکہ بتوں کی عبادت کرتا تھا تو ابراھیم علیہ السلام انہیں تبلیغ کی ۔
2۔۔ وَمَا كَانَ اسْتِغْفَارُ إِبْرَاهِيمَ لِأَبِيهِ إِلَّا عَنْ مَوْعِدَةٍ وَعَدَهَا إِيَّاهُ فَلَمَّا تَبَيَّنَ لَهُ أَنَّهُ عَدُوٌّ لِلَّهِ تَبَرَّأَ مِنْهُ إِنَّ إِبْرَاهِيمَ لَأَوَّاهٌ حَلِيمٌ
3۔۔ وَاذْكُرْ فِي الْكِتَابِ إِبْرَاهِيمَ إِنَّهُ كَانَ صِدِّيقًا نَبِيًّا (41) إِذْ قَالَ لِأَبِيهِ يَا أَبَتِ لِمَ تَعْبُدُ مَا لَا يَسْمَعُ وَلَا يُبْصِرُ وَلَا يُغْنِي عَنْكَ شَيْئًا (42) يَا أَبَتِ إِنِّي قَدْ جَاءَنِي مِنَ الْعِلْمِ مَا لَمْ يَأْتِكَ فَاتَّبِعْنِي أَهْدِكَ صِرَاطًا سَوِيًّا (43) يَا أَبَتِ لَا تَعْبُدِ الشَّيْطَانَ إِنَّ الشَّيْطَانَ كَانَ لِلرَّحْمَنِ عَصِيًّا (44) يَا أَبَتِ إِنِّي أَخَافُ أَنْ يَمَسَّكَ عَذَابٌ مِنَ الرَّحْمَنِ فَتَكُونَ لِلشَّيْطَانِ وَلِيًّا (45) قَالَ أَرَاغِبٌ أَنْتَ عَنْ آَلِهَتِي يَا إِبْرَاهِيمُ لَئِنْ لَمْ تَنْتَهِ لَأَرْجُمَنَّكَ وَاهْجُرْنِي مَلِيًّا (46) قَالَ سَلَامٌ عَلَيْكَ سَأَسْتَغْفِرُ لَكَ رَبِّي إِنَّهُ كَانَ بِي حَفِيًّا (47)
4۔۔ وَإِذْ قَالَ إِبْرَاهِيمُ لِأَبِيهِ وَقَوْمِهِ إِنَّنِي بَرَاءٌ مِمَّا تَعْبُدُونَ

مندرجہ بالا تمام ہی آیات میں بار بار لفظ ’اب‘ استعمال ہوا ہے اور اسے کے غیر حقیقی استعمال پر بظاہر کوئی دلیل نہیں
اسی قول کی تائید ایک حدیث نبوی سے بھی ہوتی ہے جسے امام بخاری رحمہ اللہ نے نقل کیا ہے۔
حدثنا إسماعيل بن عبد الله قال أخبرني أخي عبد الحميد عن ابن أبي ذئب عن سعيد المقبري عن أبي هريرة رضي الله عنه
: عن النبي صلى الله عليه و سلم قال ( يلقى إبراهيم أباه آزر يوم القيامة وعلى وجه آزر قترة وغبرة فيقول له إبراهيم ألم أقل لك لا تعصني فيقول أبوه فاليوم لا أعصيك فيقول إبراهيم يا رب إنك وعدتني أن لا تخزيني يوم يبعثون فأي خزي أخزى من أبي الأبعد ؟ فيقول الله تعالى إني حرمت الجنة على الكافرين ثم يقال يا إبراهيم ما تحت رجليك ؟ فينظر فإذا هو بذيخ متلطخ فيؤخذ بقوائمه فيلقى في النار )

اس حدیث مبارکہ میں بھی لفظ ’اب‘ ہی استعمال ہوا ہے اور یہاں اس سے ’چچا‘ مراد لینے کی بظاہر کوئی دلیل نہیں۔

جہاں تک مفسرین کی آراء کا تعلق ہے تو امام المفسرین محمد بن جرير الطبري، ابن کثیر، امام رازی سمیت کئی ایک مفسرین اسی کے قائل ہیں کہ آزر ہی ابراھیم علیہ السلام کے والد ہیں۔
چچا ہونے کا کوئی قوی قول میری نظر سے نہیں گزرا
اس سلسلے میں امام رازی کی رائے بہتر معلوم ہوتی ہے
جن کا خیال ہے کہ یہاں لفظ ’اب‘ چچا کے معنی میں ہے پہلے ان کی رائے ذکر کرتے ہیں
الوجه الرابع : أن والد إبراهيم عليه السلام كان تارح وآزر كان عماً له ، والعم قد يطلق عليه اسم الأب ، كما حكى الله تعالى عن أولاد يعقوب أنهم قالوا : { نَعْبُدُ إلهك وإله آبَائِكَ إبراهيم وإسماعيل وإسحاق } [ البقرة : 133 ] ومعلوم أن إسمعيل كان عماً ليعقوب . وقد أطلقوا عليه لفظ الأب فكذا ههنا .

پھر اس کا جواب دیتے ہیں کہ
واعلم أن هذه التكلفات إنما يجب المصير إليها لو دل دليل باهر على أن والد إبراهيم ما كان اسمه آزر وهذا الدليل لم يوجد ألبتة ، فأي حاجة تحملنا على هذه التأويلات ، .
فرماتے ہیں کہ ان تکلفات (یعنی آرز آپ کا والد ہے یا چچا، یا آزر انسان ہے یا بت، یا آزر اسم ہے یا صفت) کی طرف جانے کی ضرورت تب ہے جب ہمیں کوئی واضح دلیل سے معلوم ہو کہ سیدنا ابراھیم علیہ السلام کے والد کا نام آزر نہیں تھا، لیکن ایسی کوئی دلیل ہر گزنہیں ہے۔ تو پھر ہمیں کیا ضرورت ہے اس طرح کی تاویلات کرنے کی؟

پھر فرماتے ہیں کہ
والدليل القوي على صحة أن الأمر على ما يدل عليه ظاهر هذه الآية ، أن اليهود والنصارى والمشركين كانوا في غاية الحرص على تكذيب الرسول عليه الصلاة والسلام وإظهار بغضه ، فلو كان هذا النسب كذباً لامتنع في العادة سكوتهم عن تكذيبه وحيث لم يكذبوه علمنا أن هذا النسب صحيح والله أعلم
اس آیت کو اپنے ظاہر پر محمول کرنے کی قوی دلیل یہ ہے کہ ، یہود و نصاری اور مشرکین سخت حریص تھے آپ صلی اللہ علیہ و سلم کی تکذیب پراور اظہار بغض پر، اگر یہ نسب درست نہ ہوتا تو عادتا ان کا سکوت محال تھا، وہ ضرور اس کی تکذیب کرتے۔
تو ان کے سکوت سے یہ معلوم ہوا کہ یہ نسب درست ہے۔

مندرجہ بالا معلومات کسی حد تک اس معاملے کو سمجھنے میں مدد دے سکتی ہیں۔
ہذا ما عندی و اللہ اعلم با لصواب
وقت کی قلت اور دیگر مصروفیات کے باعث زیادہ تفصیل سے نہیں لکھ سکتا، اور جو لکھا ہے اس میں بھی غلطی کا احتمال ہو سکتا ہے، اہل علم سے التماس ہے کہ جہاں غلطی ہو تصحیح فرما دیں۔ انتہائی شکر گزار رہوں گا۔

عبداللہ حیدر

السلام علیکم، جزاک اللہ خیرا، اکرام بھائی، بہت اچھا لکھا ہے۔ اللہ تعالیٰ مزید خیر کی توفیق عطا فرمائے۔

راجہ اکرام

تمام احباب کی جانب سے حوصلہ افزائی پر شکریہ