محمد الیاس

(یہ تفریح کے لئے من گھڑت قصّہ ہے۔)

ایک نیا فوجی یوزباشی جسکو شُستہ اردو بولنے کی لت تھی ایک چھاؤنی کو آیا۔ یوزباشی نے چھاؤنی کا جائزہ لینے کے بعد رات کو تمام جوانوں کی حاضری بلائی اور تقریر کی؛
‘ میں نے سرسری جائزہ لیا، یہاں کی حالت دگرگوں ہے۔ دیکھو تو کوئی کام ڈھنگ سے نہیں ہوتا ہے اور لوگ بھی مضطرب رہتے ہیں۔ چھاؤنی میں مقیم ہوتے ہوئے لوگوں کو آپے سے باہر نہیں ہونا چاہئے تم لوگ اپنے اوقات میں رہو۔ تم لوگوں کو روزینہ کی کوئی تکلیف بھی نہیں ہے خوراک ویسے بھی گاڑی ران پہنچا دیتا ہے۔ ہتھیاروں کی حالت بھی ٹھیک نہیں ہے۔ بندوقوں کے پُرزے دیکھو؛ کُتے، گھوڑے، لبلبی، نالی؛ خدا کی پناہ۔ داغو تو شائد ہی نشانے پر بیٹھیں۔ رہی صفائی کی حالت تو صفائی عُنقا ہے، کدھر ہے؛ الامان و والحفیظ،؛ کدھر ہے؟ میں دیکھتا ہوں کس طرح سارے ٹھیک نہیں ہوتے، غلط آدمی کو قرار واقعی سزا ملے گی۔ چلو دفع ہو جاؤ۔ برخاست! ‘
اس کے بعد واپس جاتے ہوئے دو جوان آپس میں باتیں کرنے لگے۔

پہلا جوان - یار نئے افسر نے یہاں خاندان رکھنے والوں پر بڑا طنز کیا کہ گھروں سے نہیں نکلتے۔
دوسرا جوان - بالکل؛ وہ بات تو کسی حد تک ٹھیک ہے مگر یہ گوشت والی بات ٹھیک نہیں تھی۔ ہم کو ترکاری میں جو بوٹی ملتی ہے وہ ہم کھا لیتے ہیں، اب اگر بوٹی بڑی ہو تو اس میں ہمارا کیا قصور ہے۔
پہلا - یار انہوں نے گالیاں بھی بڑی دی ہیں، اسطرح پُرانے تجربہ کار جوانوں کو بُرے ناموں سے یاد نہیں کرنا چاہئے تھا انکی شکایت کرنی چاہئے۔ بندوقیں اگر خراب ہیں تو ٹھیک کرائے جا سکتے ہیں اور گندے ہوں تو صاف کریں گے۔ نشانہ بازی کی جگہ پر بھی تو مقرّر کردہ جوان آخر تک نشان کے پاس بیٹھے ہی رہتے ہیں ۔
دوسرا - صفائی پر شائد ان کو زیادہ غصّہ آیا ہوا تھا جسکے لئے انہوں نے پہلے ہی ایک سزا تجویز کی ہوئی ہے۔ اور یار یہ امان اور حفیظ کون ہیں جو یہاں موجود نہیں تھے۔ لگتا ہے سارا پھڈا انکی وجہ سے پڑا تھا۔

(یُوزباشی - captain روزینہ - ration گاڑی ران - Driver کُتّا - cock of a gun گھوڑا - striking hammer/pin لبلبی - trigger داغنا - to fire/shoot عنقا - phoenix )

wajee

ہاہاہاہا اچھا ہے ۔۔۔۔۔۔