بزم خیال

تحریر : محمودالحق

آج ہم جس طرف بھی نظرڈالیں بحث و مباحث کا بازارگرم نظرآتا ہے ۔ملکی سیاست سے لیکر چینی کی عدم دستیابی تک ہر ضروری اور غیر ضروری موضوع پر تبادلہ خیال کیا جا رہا ہے ۔اپنی کہی بات کو سچ ثابت کرنے کے لئے ایڑی چوٹی کا زور آواز کو دوسروں سے بہت اونچا رکھنے سے کیا جا رہا ہے ۔ایک کے بعد ایک لطیفہ منظر عام پہ آرہا ہے ۔قوم میں مایوسی کا بڑھنا اضطراب کا موجب بن رہا ہے۔ خاندان میں مردوں اور گھروں میں خواتین کا کردار ہمارے معاشرے میں کیا اہمیت رکھتا ہے ۔ کوئی ڈھکی چھپی بات نہیں ۔مگر آہستہ آہستہ کچھ ان دیکھے انداز میں تبدیلی کا عمل معاشرے میں کسی زہر کی طرح سرایت کرتا جا رہا ہے۔اور جسے ہم غیر اہم قرار دے کر کبوتر کی طرح آنکھیں بند کرتے جا رہے ہیں۔ مگر بلی جدید ٹیکنالوجی یعنی انٹر نیٹ اور الیکٹرونک میڈیا کی صورت اختیار کئے دھاک لگائے بیٹھی ہے۔اور اس انتظار میں ہے ،کہ اجتماعیت کی موجودگی میں شائد وہ اپنا کام نہ کر سکے۔ مگر انفرادیت کی وبا میں اسے اپنا کام دکھانے میں خاص مشکل پیش نہیں آئے گی ۔اور ایک کے بعد ایک اس کا لقمہ خواہش بنتا جا رہا ہے۔اور بچنے والے سہمے ہوئے پنجرے کے اندر بھی غیر محفوط محسوس کر رہے ہیں ۔پنجرہ مضبوط کرنے سے شائد جان تو بچ جائے۔ مگر خوف اور بے یقینی کی کیفیت سے چھٹکارہ پانا تبھی ممکن ہے جب بلی تھیلے میں بند کر کے دور پہنچا دی جائے۔ بلی کے گلے میں گھنٹی باندھنے سے مسئلہ کا حل ممکن نظر نہیں آتا ۔کسی کا چہرہ سرخ ہو تو اپنا تھپڑوں سے سرخ نہیں کیا جا تا ۔جیسے آج ہمارے ٹی وی پروگرام کچھ ایسا ہی منظر پیش کر رہے ہیں ۔ کسی ریڑھی فروش کی طرح مکھیاں اڑاتے ہوئے اونچی آواز میں گاہکوں کو اپنی طرف متوجہ کرنے کا طریقہ اپنائے ہوئے ہیں ۔ہر نئی ایجاد و اختراح کو اندھا دھند تقلید کی سولی پر چڑھا دیتے ہیں ۔یہ سوچے سمجھے بغیر کہ جن لوگوں کو اپنے باسی پروگرام کی بھینٹ چڑھایا جارہا ہے۔ وہ اخلاقی ، سماجی ، تمدنی ، اخلاقی اور مذہبی لحاظ سے اس بیماری کو جھیلنے کی ہمت رکھتے بھی ہیں یا کہ اس کے سائیڈ افیکٹ سے نئی بیماری کا شکار ہو جائیں۔برداشت ، صبر ، اخوت ، رواداری،محبت اور یگانگت جیسے قوی افکار بھی سبب مرض ،کمزوری اور نقاہت کا شکار ہیں۔ ہر گلی کی نکڑ سیاست کا اکھاڑا معلوم ہوتی ہے۔ ایک دوسرے پر اچھل اچھل کر الزام لگانے میں شاہی وفاداری کا تمغہ سجانے میں حق بجانب سمجھتے ہیں۔ جس انگلی کو اُٹھانا مغربی معاشرے میں معیوب سمجھا جاتا ہے ۔ہمارے ہاں بندوق کی نالی کی طرح اکڑا کر رکھا جاتا ہے۔ اور اسی سے شخصیت پر حملہ کے لئے تلوار کا کام لیا جاتا ہے۔ اس بات سے قطع نظر کہ ہم کون ہیں ۔کن کی نیابت اسلاف سنبھالے ہوئے ہیں۔ہماری طاقت کس میں ہے ، ہماری کمزوری کیا ہے۔طاقت کے استعمال سے جو قوم نہ جھک سکی ۔ اب وہ اپنے کمزور پہلوؤں سے صیاد کے چنگل میں آتی جارہی ہے۔ پشاور سے لیکر کراچی تک ٹیلیفون کی لائینوں کے ساتھ اب کیبل نیٹ ورک کےذریعے سے وہی کلچر پروان چڑھایا جارہا ۔ جس میں تقسیم ہند سے پہلےہمارے بچوں کو جب ہندوانہ رسومات کا پابند کرنے کی کوشش کی گئی ۔تو پورا مسلم معاشرہ ہی سراپا احتجاج بن گیا تھا۔ مگر کیا ہوا کہ آج گھر گھر میں ، ہر گلی کی نکڑ میں وہی تہذیب و ثقافت کا پرچار ہے۔ اور ہم ہیں کہ اپس میں اختلافات کی جنگ جیتنے میں سر دھڑ کی بازی لگانے کی کوشش میں ہیں۔مذہب ، سیاست ، معاشرت بری طرح سے متاثر نظر آتی ہے۔ہم تقسیم ہو چکے ہیں ۔ برادریوں ذاتوں میں ، سیاسی جماعتوں میں اور رہی سہی کسر فرقہ بندیوں نے پوری کردی۔
آج مجھے ایک کہاوت میں اس بوڑھے کبوتر کا اپنے ساتھ دوسرے قید پرندوں کو دیا گیا مشورہ یاد آتا ہے ۔کہ جب انہوں نے باہمی اتفاق سے ایک ساتھ پروں کو پھیلایا اور جال سمیت اُڑ گئے۔

در دستک / محمودالحق کا بلاگ

راجہ اکرام

ماشاء اللہ محمود بھائی
بہت اچھے انداز میں سمت پرواز کی جانب توجہ دلائی آپ نے، ہم در اصل تقلید اغیار میں اپنے مرکز سے دور ہوتے جا رہے ہیں، اپنی اصلیت کھوتے جا رہے ہیں۔ اور جو اپنے مرکز سے دور ہوتے ہیں ان کے بارے میں کسی نے کہا تھا کہ
اگر جدیدیت کی بلی اسی طرح ہمارے تعاقب میں رہی اور ہم کبوتر کی طرح یا تو آنکھیں بند کر کے بیٹھےرہے یا بوڑھے کبوتر کے مشورے پر عمل نہ کیا تو ’ہماری داستاں تک نہ ہوگی داستانوں میں‘۔
ایک بار پھر شکریہ اور ہدیہ تبرتک قبول کیجئے۔

و السلام
راجہ اکرام

__________________
محتاج اصلاح و دعا

راجہ اکرام

ماشاء اللہ محمود بھائی
بہت اچھے انداز میں سمت پرواز کی جانب توجہ دلائی آپ نے، ہم در اصل تقلید اغیار میں اپنے مرکز سے دور ہوتے جا رہے ہیں، اپنی اصلیت کھوتے جا رہے ہیں۔ اور جو اپنے مرکز سے دور ہوتے ہیں ان کے بارے میں کسی نے کہا تھا کہ
اگر جدیدیت کی بلی اسی طرح ہمارے تعاقب میں رہی اور ہم کبوتر کی طرح یا تو آنکھیں بند کر کے بیٹھےرہے یا بوڑھے کبوتر کے مشورے پر عمل نہ کیا تو ’ہماری داستاں تک نہ ہوگی داستانوں میں‘۔
ایک بار پھر شکریہ اور ہدیہ تبرتک قبول کیجئے۔

و السلام
راجہ اکرام

ایس اے نقوی

ماشاءاللہ بہت ہی‌خوبصورت انداز بیاں ہے محمود بھائی آپلا
آپ کو اس تحریر پر منتظمین کیطرف سے 500 پوائینٹ دیئے جاتے ہیں


معذرت کہ باقی کے 350 پوائینٹ ارسال کرنے کےلئے سسٹم اجازت نہیں دے رہا انشاءاللہ ارسال کر دیئے جائیں گے

ایس اے نقوی

سرورق کےلئے تجویز کرتا ہوں شکریہ

منتظمین

سرورق کے لیے تجویز کرتا ہوں۔
اور انجم بھائی میرا نام شامل کرنا ضروری نہیں ہے۔ مقصد سب کا ایک ہی ہے۔

__________________
تم سپاہی نہیں ہو پیشہ ور قاتلو!

ایس اے نقوی

آپ کا نام اس لئے لکھا ہے کہ ذرا میرا رعب رہے

راجہ اکرام

شاہ جی
آپ کا ویسے ہی ٹھیک ٹھاک رعب ہے، اگر مزید رعب بڑھانے کی کوشش کی تو۔۔۔۔۔۔۔۔۔۔۔۔۔۔۔۔۔۔۔۔۔۔

عامرشہزاد

لیکن بوڑھا کبوتر کہا سے آہے گا
ہم تو سب جوان کبوتر ہیں ؟؟؟؟؟؟؟؟؟؟؟؟؟؟؟؟

بزم خیال

اسلام و علیکم
بہت شکریہ راجہ بھائی
جن کی یہ ایجادات ہیں وہاں آج بھی سڑکوں ، شاپنگ پلازوں اور یونیورسٹیوں میں پبلک بوتھ موجود ہیں ۔ نہ تو موبائل فون سستے ہیں اور نہ ہی چند ڈالر یا پاؤنڈ کے عوض دنیا بھر کے چینل فری ہیں۔ لوگ ضرورت اور جیب کے مطابق چند پر اکتفا کرتے ہیں ۔ سکولنگ، میڈیکل اور ان ایملائنمنٹ تو غریبوں کو مفت ہیں مگر فون اور ڈش چینل نہیں ۔
ہمارے ہاں سب سے سستا موبائل فون اور کیبل نیٹ ورک ہیں ۔ دو یا تین سو ماہانہ پر آپ کے گھر موجود ہیں ۔ مگر تعلیم اور غریبوں کا علاج مشکل ہے۔
یہ تو ایسا معاملہ ہے کہ پتھر باندھے ہوئے ہیں اور کتے کھلے چھوڑے ہوئے ہیں۔
والسلام

بزم خیال

ایس اے نقوی بھائی اور منتظمین بھائی آپ کا شکریہ میری تحریر کو اس قابل سمجھا ۔ آپ سب کی حوصلہ افزائی ہی کسی انعام و اکرام سے کم نہیں۔
والسلام

بزم خیال

بوڑھا کبوتر تو صرف مشورہ دے پائے گا اور طاقت سے اُ ڑنے کا دم تو جوان کبوتر کے ہی پاس ہے------------ --- شاعر مشرق علامہ اقبال حساس دل و دماغ کے مالک تھے اور انہیں نے نئی نسل میں انقلابی روح پھونکی اور اسلامی عظمت کو اجاگر کیا۔

راجہ اکرام

و علیکم السلام
محمود بھائی
آپ نے بالکل درست فرمایا، انہوں نے یہ اشیاء ایجاد تو کیں لیکن استعمال میں اعتدال کی روش کو ترک نہیں کیا ان کے فوائد کے حصول کے ساتھ ساتھ نقصانات سے تحفظ کا بھی بھرپور خیال رکھا۔
اور ہمارا مسئلہ یہ ہے کہ ہم تقلید کے خوگر ہیں، نظریات سے لے کر آلات تک، ہر وہ چیز جو وہاں سے آتی ہے اس کے استعمال میں‌ہم ایسی روش اختیار کرتے ہیں کہ خود بنانے والے بھی حیران رہ جاتے ہیں۔
بطور خاص موبائل اور چینلز جن کی طرف آپ نے توجہ دلائی واقعی خطرناک صورتحال اختیار کر چکے ہیں۔

بزم خیال

راجہ بھائی آپ نے بجا فرمایا صورتحال ایسی ہی ہے۔ اعتدال کی بجائے بےجا استعمال سے فوائد کم اور نقصان زیادہ ہو رہا ہے
والسلام

نیلم خان

ماشاءاللہ بہت ہی‌خوبصورت انداز بیاں ہے محمود بھائی