shafresha

بھارتی اداکار عامر خان اپنی فلموں میں‌فلم بینوں کو کوئی نا کوئی پیغام ضرور دیتے ہیں (اُن کی فلم گجنی کے پیغام کے لیئے لوگ اپنے موبائل فون کے اِن بکس کو چیک ہی کرتے رہے مگر وہ نا آیا) ۔

میں‌عموما اُردو فلمیں‌دیکھنے سے دانستاً گریز ہی کرتا ہوں مگر اپنے ایک آفس گولیگ کشور آسمل کے اصرار پر پچھلے دنوں ‌ریلیز ہونے والی فلم 3 Idiots کو دیکھنے کا اتفاق ہوا۔ اُس فلم کو دیکھ کر مجھے ایک شخص کی یاد آ گئی سوچا آپ سے بھی شئیر کیا جائے۔

چناچہ اس بات پر بحث کی جاسکتی ہے کہ کیا ڈگری ہولڈر ہونا کسی کے پڑھے لکھے یا قابل ہونے کی دلیل ہے؟
یا
علم محض درسگاہوں اور مدارس کے ذریعے ہی حاصل کیا جا سکتا ہے؟
یا
کسی ارادے سے سند یافتہ ہونا آپ کے متعلقہ فن میں‌ماہر کا ثبوت ہے وغیرہ وغیرہ

اُس نے ایک غریب گھرانے میں‌آنکھ کھولی تھی۔ اگرچہ گھر میں پیسے کی ریل پیل نا تھی مگر گزارہ باآسانی ہوتا تھا۔ محلے کے دیگر بچوں کی بنسبت اُسے کتابیں اچھی لگتی تھیں۔ نانا کے گھر میں پڑی موٹی موٹی کتابوں‌کی دیکھ کر وہ دلچسپی سے اُنھیں‌اٹھاتا اور جھوٹ‌موٹ پڑھنے لگتا۔

کاغذ اُس کی کمزوری تھا خواہ وہ کسی اخبار کا تراشہ ہو یا کسی رسالے کا ٹائٹل وہ اُسے ایک مرتبہ دیکھتا ضرور تھا۔ اسکول میں داخلے کے بعد اُس کا یہ جنون بڑھتا گیا۔ وہ سب کچھ بہت جلدی پڑھ لینا چاہتا تھا۔ گھر میں‌بھی وہ اپنی کاپیوں پر لکھتا رہتا، کاپیوں کے جلد سیاہ ہونے جانے پر ڈانٹ‌ پڑنے لگی تو اُس نے اپنے بستے میں‌اسکول سے ملنے والے ردی کاغذ بھرنے شروع کردیئے۔ وہ سب سے بے خبر گھر میں‌لگے بیری کے درخت پر بیٹھا کچھ نا کچھ لکھتا یا پڑھتا رہتا۔

دوسری جماعت ہی سے اخبار پڑھنے کے قابل ہوگیا۔ امی سودے کب منگوائیں گی؟ وہ ناشتہ کرکے سوال کرتا۔ محلے کے دُکاندار کے یہاں جنگ اخبار آتا ہے وہ یہ جانتا تھا۔ سودا لینے کے بہانے وہ چھپ چھپ کر اخبار پڑھا کرتا تھا۔طریقہ واردات یہ تھا کہ وہ دُکان سے دور کھڑا ہوکر دُکان پر بھیڑ لگ جانے کا انتظار کرتا اور پھر چپکے سے دُکان کے اندر داخل ہو کر اخبار اُچک لیتا جو عموماً چاول کی کھلی بوری پر رکھا ہوا ہوتا تھا۔ جلد ہی اُس کی یہ چالاکی پکڑی گئی جب دُکاندار نے اُسے تازہ اخبار پڑھتے ہوئے "رنگے ہاتھوں" پکڑ لیا۔
یہ کیا ہے بے؟ دُکاندار اُس پر برسا!
مم مم مہ وہ ممیایا۔ ۔ ۔ ۔ ۔

اُس دن کے بعد کچھ دنوں تک وہ خوف کے مارے دُکان پر نہیں‌گیا۔ پھر کچھ دنوں کے بعد جب دُبارہ جانا ہوا تو تازہ اخبار کو دیکھ کر اُس کی آنکھوں میں‌"تازی ڈبل روٹی"‌گھوم گئی۔ دُکاندار بھی یہ بات بھانپ گیا اور پھر اُس روز اُس کے اور دُکاندار کے درمیان ایک معاہدہ طے پایا کہ جب رش ہوگا تو وہ سامان کے دینے میں‌دُکاندار کی مدد کرے گا اور اُس کے صلے میں‌اُسے اخبار پڑھنے کی اجازت ہوگی، مگر سُرخیوں والا صفحہ پہلے دُکاندار پڑھے گا۔ اُس نے فوراً حامی بھر لی۔ یوں وہ سُرخیوں‌سے پہلے کالم والا صفحہ پڑھتا۔ کالم والے صفحے پر رئیس امرہوی کے اشعار (قطعہ) اُس کی معصوم سمجھ میں‌نہیں آتے تھے، ایک دن اُس نے دُکاندار سے اُن کا مطلب پوچھا، ہا ہا ہا ابے میں‌کیا جانو! اُسے جواب ملا۔

پھر اُس نے یہ اشعار ایک کاغذ پر نوٹ‌کرنا شروع کردیئے۔ وہ یہ اشعار لے کر اپنے اُستاد کی خدمت میں ‌حاضر ہوا تیسری کلاس کے بچے کے ہاتھ میں‌ "ہزار عالم و آدم ہزار خالق و خلق ابھی ہیں عرصہِ تخلیق میں" جیسا مصرعہ کہنے والے شاعر و فلسفی کے اشعار دیکھ کر حیراں ہوئے اور پھر اُس دن سے وہ بچہ اُن کی نگاہوں‌کا مرکز بن گیا۔

وہ ایک گورنمنٹ اسکول تھا، لائیبریری کا کوئی تصور نا تھا۔ پانچویں‌کلاس میں‌اُسے کسی نے بتایا کہ ڈیڑھ گھنٹے کی مُسافت پر ایک لائیبریری ہے جہاں ‌بے شمار کتابیں‌ہیں اور اُنھیں پڑھنے پر کوئی پابندی نہیں‌ہے‌، اچھا! اُس کی نگاہوں کے سامنے سینکڑوں‌ڈبل روٹیاں‌ ناچنے لگیں۔

لائبریری میں‌داخل ہوکر اُس کی آنکھیں کھلی کی کھلی رہ گئیں چاروں طرف قد آدم الماریوں‌کی شیشے سے جھانکتی رنگ برنگی جلدوں میں‌کتابیں اُسے دادی کی کہانیوں کی پریوں‌کی مانند لگیں‌۔
مجھے ایک کتاب چاھیئے اُس نے جھجھکتے ہوئے کہا ، کون سی؟ لائبریریئن نے چشمے کے پیچھے سے جھانکتے ہوئے کہا۔
کوئی سی بھی اُس نے کاندھے اُچکا کر کہا!
میاں‌ پہلے معلوم کرکے کے آؤ کون سی چاھیئے ورنہ وہاں انڈیکس پڑی ہے اُس میں‌دیکھ لو! بوڑھا لائبریریئن منہ ہی منہ میں‌کچھ بڑبڑایا۔
انڈیکس میں‌لگے کارڈز دیکھ کر اُس کا دماغ چکرانے لگا پھر اچاننک اُس کی نظر الف لیلۃ پر پڑھی۔ یہ والی! اُس نے بھاری انڈیکس اُٹھا کر لائبریریئن کے سامنے رکھتے ہوئے اشارے سے کہا۔

الف لیلۃ جانتے ہو اس کا کیا مطلب ہے؟ بوڑھا لائبریریئن چیخا!
ایک ہزار کہانیاں ہیں اس میں‌تم کیسے پڑھو گے؟
اچھا یہ لو اُس نے "عمرو عیار کے کسی کارنامے"‌ کی کوئی کتاب اُس کے سامنے رکھ دی، وہاں سامنے بیٹھ کر پڑھ لو اور دیکھو یہ پھٹے نہیں‌ورنہ پورے پیسے بھرنے پڑیں‌گے، لائبریریئن نے کہا۔

جی وہ حسب معمول ممیایا!
یہ اُس کا لائیبریری سے پہلا رشتہ تھا!


جاری ہے ۔ ۔ ۔ ۔ ۔ ۔ ۔۔

منتظمین

عدنان بھائی نے
mobiles.pak.net چلانے کا ارادہ کیا ہے۔ جلد ہی اس سائٹ‌کی لانچنگ شروع کی جائے گی۔

بزم خیال

اسلام و علیکم
شاہ فریشہ بھائی بہت خوب لکھا ۔ پورا پڑھے بغیر تو اٹھا ہی نہیں جاتا ۔ اب قسط نہ چلائیں فلم کی طرح دکھائیں ۔ کاغذ کی کشتی میں آپ نے بچپن یاد دلا دیا اور مجھے کالونی سے کمپیوٹر تک لکھنے کی تحریک پیدا ہوئی ۔

__________________

رضی

شاہد بھائی کافی دفعہ اس تھریڈ پر آیا اور چپکے سے نکل گیا۔ لکھاری کا نام دیکھتا ہوں تو دل کرتا ہے کہ پڑھوں لیکن جب یہ الفاظ "بھارتی اداکار عامر خان اپنی فلموں" ہی پڑھتا ہوں تو آگے پڑھنے کو دل نہیں کرتا۔

آپ کی تحاریر بہت اچھی ھوتی ہیں پڑھنے کو دل کرتا ہے لیکن بھارت سے نفرت غالب آجاتی ہے بھارت اتنی نفرت ہے کہ ان کی تعریف سننے کو بھی دل نہیں کرتا ۔


یہ میرے اپنے جذبات ہے

__________________

اپنی ملت پر قیاس اقوام مغرب سے نہ تر
خاص ہے ترکیب میں قوم رسول ہاشمی

shafresha

رضی میری جان آپ کے جذبات یقینا قابل قدر ہیں،
مگر
میری دانست میں‌یہ "تعصب" ہے!

فن اور فنکار سے ایسا رویہ رکھنا مُناسب نہیں ورنہ ہم میں‌اور "شیو سینا" میں‌کیا فرق ہوا؟

رضی

میں اعتراف کرتا ہوں کہ بھارت کے معاملے میں، میں متعاصب ہوں۔

shafresha

آ پ کی سچ گوئی کا شکریہ!
بھارت (انڈیا) میرے والدین کی جنم بھومی ہے میں چاہتے ہوئے بھی اُس سرزمین سے نفرت نہیں کرپاتا!!!

ابو عمار

رضی میں بھی آپ کے جذبات کی قدر کرتا ہوں اور میں خود بھی ان سے سخت نفرت کرتا ہوں۔

حیدر

معلوم نہیں کہ میں شافی بھائی کا لکھا یہ کالم کبھی مکمل پڑھ پاؤں گا کہ نہیں تاہم یہ ضرور ہے کہ بہت اعلیٰ پائے کی اور قاری کوجکڑ لینے والی تحریر ہے۔ فی الوقت تو میں تحریر اور 3 idiotsمیں ربط تلاش کر رہا ہوں۔
فلمیں تو کم کم ہی دیکھتا ہوں ،اتفاقاً پچھلے دن مذکورہ بالا فلم دیکھنے کا اتفاق ہوا۔ ذاتی حیثیت میں مجھے اس فلم کے دئیے ہوئے پیغام سے کافی حد تک اتفاق ہے۔اور میں اس فلم کا حوالہ اپنے طلبا کو بھی دے چُکا ہوں۔
شافی بھائی کے آباؤ اجداد کی جنم بھومی تو چلو بھارت سے ہے تبھی وہ بھارت سے نفرت نہیں کرتے، میرا تو بھارت سے تعلق نہ تین میں ہے نہ تیرا میں ۔ ۔ ۔ لیکن پھر بھی مجھے بھارت سے کسی قسم کی نفرت نہیں۔

shafresha

بدر بھائی آپ کےتبصرے کا شکریہ!

شاہ جی 90

شافریشہ بھائی
نفرت بھارت کی سرزمین سے نہیں
نفرت تو ہندو کے مسلمانوں کے خلاف نفرت بھرے روئیے کی وجہ سے ہندوئوں سے ہے اور ہندوستانی حکومت سے ، میرے خیال سے شاید رضی بھی اتفاق کریں گے

حیدر

شافی بھائی آج ایک ہفتے بعد آ رہا ہوں لیکن اگلی قسط نہیں ائی۔
نفرت برائی سے کرو، بُرے سے نہیں۔/دانا کہتے ہیں۔

شاہ جی 90

شافریشہ بھائی
ہمیں بھی شدت سے انتظار ہے
لنک یہاں پوسٹ کر دیں اور اس سلسلے کو رکنے نہ دیں

shafresha

تیسرا حصہ!

عربی و فارسی رسم الخط میں اُردو زبان لکھنے اور پڑھنے کے عادی ذہن کو انگلش زبان کے حروف تہجی عجیب و غریب لگے۔
خدا بھلا کرے سر سعید کا کے اُنہوں نے ننھے ذہنوں کو کھیل ہی کھیل میں ان حروف تہجی سے روشناس کروا دیا۔

وہ اکثر چھوٹی چھوٹی کہانیاں انگلش میں سُناتے اور پھر اُن کا ترجمعہ کرتے یوں اُس کی دلچسپی اپنے دیگر ساتھیوں کی بہ نسبت اس نئی زبان سے پڑھتی جارہی تھی۔ ان نئی طرز کی کہانیوں میں جن ہوتے تھی اور نا ہی جادوگر افراسیاب، یہ کہانیاں کسی بھی عمرو کے دلچسپ فریب اور ملا نصیر الدین و بیربل کے حکمت بھر ے مناظروں سے خالی ہوتیں تھیں مگر اُسے ان کی "ہیپی اینڈنگ" سے محبت ہوگئی تھی۔

اُس نے اپنی ساری توجہ "اے فار ایپل" اور "زیڈ فار زیبرا" کو پڑھنے میں لگا دی۔
اسے ایپل کہتے ہیں! اُس نے دادی کو سیب کاٹتے ہوئے دیکھا تو کہا!
وہ ہنس پڑی، لے تو بھی ایپل کھا لے اُنہوں نے بڑی محبت سے کہا!

جلد ہی اُسے انگلش حروف تہجی کی کتاب ختم کرلی۔ وہ تمام حروف سے آگاہی حاصل کرچکا تھا۔ سر سعید نے ان حروف سے شروع ہونے والے دیگر الفاظ بھی اُسے لکھ کر دیئے۔اُس نے جلد ہی اُنہیں بھی یاد کرلیا۔

پھر ایک دن اُس پر ایک عجیب بات کا انکشاف ہوا!
واقعہ کچھ یوں ہے کے سر سعید نے انگلش کی "ڈکٹیشن" لینے کا پلان بنایا، تمام بچوں کی طرح اُس نے بھی مکمل تیاری کی ہوئی تھی۔ و ہ اپنے اس نئے امتحان کے بارے میں بہت پرجوش تھا۔ پہلے ہی پیرئڈ انگلش کا تھا۔

سر سعید نے "ایل فار لوئن" کہا، بچوں نے لکھنا شروع کیامگر وہ "Lion" نہیں لکھ پا رہا تھا، سر سعید نے "ایکس فار زائلوفون" کہا، مگر وہ کچھ لکھ نہیں پا رہا تھا، اُس کی آنکھوں کے سامنے تارے سے ناچنے لگے۔ حروف تہجی ایک ایک کرکے اُس کے ذہن میں آ رہے تھے اور جا رہے تھے۔ سر سعید ایک کے بعد ایک لفظ پکارتے جا رہے تھے مگر اس کی سمجھ میں کچھ نہیں آ رہا تھا۔

پھر ٹیسٹ کا وقت ختم ہوگیا، اُس کے سامنے خالی کاغذ اُس کا منہ چڑا رہا تھا۔ سر سعید کو یقین نہیں آ رہا تھا، یہ تم نے کیا کیا؟ اُنہوں نے حیرت سے پوچھا،
سر مجھ سے کچھ لکھا ہی نہیں گیا! اُس نے معصومیت سے کہا،
مگر کیوں ؟ اب اُن کے لیجے سے غصہ جھلک رہا تھا،
معلوم نہیں سر! وہ سر جھکا کر بولا

اُسے 0/10 نمبر ملے ۔ ۔ ۔ ۔ ۔ ۔

یہ تو اُسے کافی عرصے بعد معلوم ہوا کہ وہ "Dyslexia" ہے، یعنیٰ تیس سال بعد بھی وہ اسپیلنگ یاد نہیں رکھ پاتا!


جاری ہے ۔ ۔ ۔ ۔

اجنبی انسان

4th حصہ کا انتظار رہے گا مجھے شاھد بھائی شکریہ

shafresha

بشرطِ حیات جلد ہی حکم کی تعمیل ہوگی!