عبداللہ حیدر

اسلام کو اپنی صفائی کی کوئی ضرورت نہیں
بعض ایسے متکلمینِ اسلام بھی پائے جاتے ہیں جو لوگوں کے سامنے اسلام کو اس حیثیت سے پیش کرتے ہیں کہ گویا اسلام کا ایک ملزم ہے اور وہ اس کے وکیلِ صفائی ہیں۔ وہ اسلام کی صفائی اور دفاع جس طریقہ سے کرتے ہیں وہ کچھ اس طرح کا ہے کہ“نظامِ حاضر نے فلاں اور فلاں کام کیے ہیں اور کہا جاتا ہے کہ اسلام نے یہ کام کر کے نہیں دکھائے ، مگر صاحبو! اسلام تو ان کاموں کو پہلے کر چکا ہے جنہیں موجودہ تہذیب 14 سو سال بعد کر رہی ہے " کیا گھٹیا دفاع ہے اور کیا بھونڈی صفائی ہے !! ۔ ۔ ۔ ۔ ۔ ۔ ۔۔
ہم جس اسلام کے علمبردار ہیں اس میں کوئی ایسا پہلو نہیں ہے جو ہمارے لیے کسی شرمندگی یا احساسِ کہتری کا موجب ہو یا جس کی صفائی کی ہمیں ضرورت ہو، اور نہ اس کے اندر کوئی ایسا نقص ہے جس کی وجہ سے ہم اُسے لوگوں تک پہنچانے کے لیے کسی طرح کی ریشہ دوانی کی ضرورت محسوس کریں۔ یا اُس کی اصلیت کے تقاضا کے تحت ڈنکے کی چوٹ اُس کا اعلان کرنے کی بجائے طرح طرح کی نقابیں ڈال کر اُسے پیش کریں۔ دراصل یہ روگ مغرب اور مشرق میں پھیلے ہوئے جاہلیت زدہ نظاموں سے رُوحانی اور نفسیاتی شکست کھا جانے کی وجہ سے بعض “مسلمانوں“ کو لاحق ہوگیا ہے اور وہ انسانی قوانین کے اندر ایسے پہلو تلاش کرنے میں لگے رہتے ہیں جن سے وہ اسلام کی موافقت اور تائید کر سکیں، یا وہ کافروں کے کارناموں کے اندر ان باتوں کی ٹوہ کرتے رہتے ہیں جن سے یہ دلیل فراہم کر سکیں کہ اسلام نے بھی یہ کام کر دکھائے ہیں۔
جو شخص اسلام اور اس کی تعلیمات کی صفائی کی ضرورت محسوس کرتا ہے یا معذرت خواہانہ ذہنیت رکھتا ہے تو ایسا شخص ہرگز اسلام کی صحیح نمائندگی نہیں کرسکتا، بلکہ یہ وہ بیوقوف دوست ہے جو خود تو اس بودی اور کھوکھلی جاہلیت سے مرعوب و مغلوب ہوچکا ہے ، جو تضاد سے بھری ہوئی ہے اور نقائص سے جس کا جسم داغ داغ ہے مگر وہ کم کوش بایں ہمہ اُلٹا جاہلیت کے لیے جواز فراہم کرتا ہے ۔ یہ حضرات اسلام کے دشمن ہیں اور اسلام کی خدمت کے بجائے اُسے ضعف پہنچاتے ہیں۔ بلکہ دوسروں کو بھی مجبور کرتے ہیں کہ وہ ان کی ژاژخائیوں کا سدِباب کریں۔ ان کی باتیں سُن کر یُوں محسوس ہوتا ہے کہ اسلام مجرموں کے کٹہرے میں کھڑا ہے اور اپنا دفاع کرنے پر اپنے آپ کو مجبور پاتا ہے !
(جادہ و منزل)

فیصل ناصر

اللہ آپ کو جزائے خیر دے بہترین موضوع پر قلم اٹھایا ہے

ھارون اعظم

یہ شائد سید قطب شہید کی کتاب کا اقتباس ہے؟

عبداللہ حیدر

جی، یہ سید قطب کی کتاب "جادہ و منزل" سے لیا گیا ہے۔ مراسلے کے آخر میں حوالہ موجود ہے۔

ھارون اعظم

بہترین کوشش ہے۔ امید ہے آپ مزید بھی شئیر کریں گے۔ سید قطب کی تصانیف آج کے نوجوان نسل کے لئے رہنمائی میں اہم کردار ادا کرسکتی ہیں۔

عبداللہ حیدر

السلام علیکم، رسول اللہ صلی اللہ علیہ و علی آلہ وسلم کے علاوہ ہر شخص کے قول میں صواب و خطا کا احتمال ہو سکتا ہے اس لیے سید قطب رحمۃ اللہ علیہ کے تمام نظریات سے اتفاق یا اختلاف کرنا مشکل ہے۔ان کی وہ تحریریں پڑھے اور سمجھے جانے کے زیادہ لائق ہیں جن پر کوئی علمی اعتراض نہیں ہے اور جن میں وہ اسلام کا دفاع پوری قوت سے کرتے نظر آتے ہیں۔ مثلًا المعالم فی الطریق (جادہ و منزل) میں "لا الٰہ الا اللہ منھج الحیاۃ" کے نام سے جو باب ہے اس کے بارے میں امام البانیؒ نے کہا تھا: "اس میں علم و نور جھلکتا ہے"۔ جبکہ دوسری جانب ان کی وہ کتابیں بھی موجود ہیں جن پر محققین اور علماء نے زبردست تنقید کی ہے اور دلائل کے ساتھ ان کے موقف کو غلط ثابت کیا ہے۔ مثلا "العدالۃ الاجتماعیۃ فی الاسلام" وغیرہ۔

ھارون اعظم

آپ سے متفق ہوں۔ بیشک سید قطب بھی انسان ہیں۔ ان سے بھی غلطی ہوسکتی ہے۔ ہمیں عقیدت کے نام پر کسی کی غلطیوں کا دفاع نہیں کرنا چاہیئے۔

ضِرار Derar

السلام علیکم
عبداللہ حیدر صاحب
آپ بھی اپنے چچا کی طرح بلکہ اس سے بھی زیادہ مشکل مشکل باتین لکھتے ہو
جناب آپ لوگ ذرا خیال رکھا کرو کچھ میرے جیسے ماٹھی اردو والے بھی ہوتے ہین

عادل سہیل

و علیکم السلام،
ضِرار بھائی ، ہم چچا بھتیجا پنجابی میں بھی بات کرتے ہیں ،
آپ کی اردو اگر ماٹھی ہے تو پنجابی میں بات کر سکتے ہیں
جی آیاں نُوں پائی جان،
تہاڈی اِک فرمایش تھوڑی جےای پوری کیتی اے ، ٹیم ملے تے ذرا """ اینوں """ پڑھ لینا ، و السلام علیکم۔

__________________
اب نہ ہو گا کہیں کوئی نزول کتاب ::: بند کر دیا رب العالمین نے یہ باب
ہے جو بھی صحیح سنت رسالت مآب ::: بے شک ہے وحیء رب الارباب

ضِرار Derar

السلام علیکم
پنجابی لکھنا تو اردو سے بھی اوکھا کام ہے جناب
آپ چاچا بھتیجا ہی ہاتھ پولا کر لو
تو چنگی گل ہے