عبدالقدوس

جانوروں کے جھوٹے کا بیان

مسئلہ ١۔ آدمی کا جھوٹا پاک ہے چاہے بددین ہو یا حیض سے ہو یا ناپاک ہو یا نفاس میں ہر حال میں پاک ہے۔ اس طرح پسینہ بھی ان سب کا پاک ہے البتہ ان کے ہاتھ یا منہ میں کوئی ناپاکی لگی ہوئی ہو تو اس سے وہ جھوٹا یا ناپاک ہو جائے گا۔

مسئلہ ٢۔ کتے کا جھوٹا نجس ہے اگر کسی برتن میں منہ ڈال دے تو تین دفعہ دھونے سے پاک ہو جائے گا چاہے مٹی کا برتن ہو چاہے تانبے وغیرہ کا۔ دھونے سے سب پاک ہوجاتا ہے لیکن بہتر یہ ہے کہ سات مرتبہ دھوئے اور ایک مرتبہ مٹی لگا کر مانجھ بھی ڈالے کہ خوب صاف ہو جاوے۔

مسئلہ ٣۔ سور کا جھوٹا بھی نجس ہے اسی طرح شیر، بھیڑیا ، بندر ، گیدڑ وغیرہ جتنے پھاڑ چیر کر کھانے والے جانور ہیں سب کا جھوٹا نجس ہے۔

مسئلہ ٤۔ بلی کا جھوٹا پاک توہےلیکن مکروہ ہے تو اور پانی ہوتے ہوئے اس سے وضو نہ کرے البتہ کوئی اور پانی نہ ملے تو اس سے وضو کرلے۔

مسئلہ ٥۔ دودھ، سالن وغیرہ میں بلی نے منہ ڈال دیاتو اللہ نے سب کچھ زیادہ دیا ہو تو اسے نہ کھاوےاور اگر غریب آدمی ہو تو کھا لیوے اس میں کچھ حرج اور گناہ نہیں ہے۔ بلکہ ایسے شخص کے واسطے مکروہ بھی نہیں ہے۔

مسئلہ ٦۔ اگر بلی نے چوہا کھایا اور فوراً آکربرتن میں منہ ڈال دیا تو وہ نجس ہو جاوے گا اور تھوڑی دیر ٹہر کر اپنا منہ ڈالے کہ اپنا منہ زبان سے چاٹ چکی ہو تو نجس نہ ہوگابلکہ مکرہ ہی رہے گا۔

مسئلہ ٧۔ کھلی ہوئی مرغیاں جو ادھر ادھر گندی پلیدچیزیں کھاتی پھرتی ہیں ان کا جھوٹا مکروہ ہےاور جو مرغی بند رہتی ہو اس کا جھوٹا مکروہ نہیں بلکہ پاک ہے۔

مسئلہ ٨۔ شکار کرنے والے پرندے جیسے شکرہ، باز وغیرہ ان کا بھی جھوٹا بھی مکروہ ہےلیکن جو پالتو ہواور مردار نہ کھانے پاوے اور نہ انکی چونچ میں کسی نجاست کے لگے ہونے کا شبہ ہواس کا جھوٹا پاک ہے۔

مسئلہ ٩۔ جو چیزیں گھروں میں رہا کرتی ہیں جیسے سانپ،بچھو، چوہا، چھپکلی وغیرہ ان کا جھوٹا مکروہ ہے۔

مسئلہ ١٠۔ اگر چوہا روٹی کتر کر کھا جاوے تو بہتر ہےاس جگہ سے تھوڑی سی توڑ ڈالےتب کھاوے۔

مسئلہ ١١۔ گدھے اور خچر کا جھوٹا پاک تو ہے لیکن وضو ہونے میں شک ہےتو اگر کہیں فقط گدھے اور خچر کا جھوٹا پانی ملے اور اس کے سوا کوئی اور پانی نہ ملے تو وضو بھی کر لے اور تیمم بھی کر ےاور چاہے پہلے وضو کرلے اور چاہے پہلے تیمم کرلے دونوں اختیار ہیں۔

مسئلہ ١٢۔جن جانوروں کا جھوٹا نجس ہےان کا پسینہ بھی نجس ہے اور جن کا جھوٹا بھی پاک ہےان کا پسینہ بھی پاک ہے۔ اور جن کا جھوٹا مکروہ ہے ان کا پسینہ بھی مکروہ ہے۔ اور گدھے اور خچر کا پسینہ بھی پاک ہے کپڑے اور بدن پر لگ جائے تو دھونا واجب نہیں لیکن دھوڈالنا بہتر ہے۔

مسئلہ ١٣۔ کسی نے بلی پالی اور وہ پاس آکر بیٹھتی ہے اور ہاتھ وغیرہ چاٹتی ہے تو جہاں چاٹے تا اس کا لعاب لگے اس کو دھو ڈالنا چاہیے اگر نہ دھویا یا یونہی لگا رہنے دیاتو مکروہ اور برا کیا۔

مسئلہ ١٤۔ غیر مرد کا جھوٹا کھانا اور پانی عورت کے لئے مکروہ ہے جبکہ وہ جانتی ہو کہ یہ اس کا جھوٹا ہے اور اگر معلوم نہ ہو تو مکروہ نہیں۔

__________________