محبوب عالم

آج کل ہر جگہ یہ سننے کہ ملتا ہے کہ اُردو چوپال خانے بہت زیادہ ہوگئے ہیں اور اُردو زبان کیلئے بہت کام ہورہا ہے. لیکن جب میں نے اِن چوپال خانوں کی زیارت کی تو میں حیران رہ گیا کہ یہاں تو اُردو زبان کی کوئی چیز ہے ہی نہیں، بلکہ انگریزی کو اُردو رسم الخط میں لکھ دیا جاتا ہے اور یہ دعویٰ کیا جاتا ہے کہ یہ انٹرنیٹ پر اُردو کا استعمال ہے. ایک اور بات جو یہ اُردو چوپال خانوں کے منتظیم کرتے ہیں وہ یہ کہ ہمارے ہاں بہت سے لوگ انگریزی لکھ پڑھ یا سمجھ نہیں سکتے لہٰذا ہمیں اُردو ہی کو انٹرنیٹ (کمپیوٹر) پر استعمال کرنا چاہئیے. یہاں ایک بار پھر میرا سر شرم سے جھُک جاتا ہے کہ اَب بھی وہی لوگ کمپیوٹر کو نہیں سمجھ سکتے کیونکہ وہی انگریزی آپ اُردو رسم الخط میں لکھ رہے ہیں، کچھ تبدیلی واقع نہیں ہوئی. ہونا تو یہ چاہئیے کہ ایک لفظ جو آپ انگریزی کا استعمال کررہے ہیں، اگر آپ وہی لفظ اُردو کا استعمال کریں تو لوگوں (خصوصاً وہ جن کو انگریزی کی سمجھ بوجھ نہیں ہے) کو آسانی سے سمجھ آجائے گی. اُردو کے الفاظ استعمال کرنے سے یہ زبان ترقی بھی پائے گی اور اِس کی ترقی ہمارے لئے باعث فخر و عزت ہے. آپ تمام دوستوں سے گزارش ہے کہ انگریزی الفاظ کے متبادل اُردو الفاظ استعمال کیا کریں. کچھ عمومی الفاظ کی فہرست مندرج ذیل ہے:
Internet : جالبین (جال + بین | جالِ بین)
Web : حبالہ
World Wide Web: حبالہ محیط عالم
Software: مصنع لطیف
Hardware: مصنع کثیف
Application: نفاذیہ
Application Software : نفاذی مصنع لطیف
Log : نوشتہ
Log In : داخل نوشتہ
Log Out: خارج نوشتہ
Size : جسامت
Font : اندازِ خط / رسم الخط / خط
Hard Disk: قرص کثیف
Forum : چوپال
Option: اختیار
Options: اختیارات
Tag: دھجی
Keyboard: تختۂ کلید
Operating System: عملیاتی نظام
Computer: شمارندہ / حاسب
Network: جالکار (جال + کار | جالِ کار )
Portal: آستانہ / چوکھٹ / بوابہ
Post : چسپانہ
Arcade : رواق

اگر آپ کے ذہن میں سوال اُبھر رہا ہے کہ اگر ہم ایسی اُردو استعمال کریں گے کسی چوپال پہ (جیسے یہ چوپال) تو کسی کو سمجھ نہیں آئے گی. تو جواب یہ ہے جناب کہ آپ اگر خالصاً اُردو استعمال کریں گے تو لوگوں کو وُہ اُردو سیکھنی ہوگی. اِس کیلئے آپ ایک حصّہ اپنے چوپال میں مخصوص کرسکتے ہیں جہاں اِن اِصطلاحات اور اُن کی معنی کو درج کیا گیا ہو. جب ایک صارف اِن اصطلاحات کو دیکھے گا تو وہ پھر اِنہی کو استعمال کرے گا. اِس طرح ہم بھی یہ دعویٰ کرنے کے قابل ہوجائیں گے کہ ہماری قومی زبان انگریزی سے کم نہیں.
نوٹ: مندرجہ بالا اِصطلاحات کی طرح آپ کو اور بھی کئی جدید اِصطلاحات اُردو ویکیپیڈیا سے مل سکتی ہیں. پتہ ہے: http://ur.wikipedia.org
آئیے! اُردو کا استعمال کرکے اپنی محبّ وطنی کا ثبوت دیں.

میاں شاہد

انکل اگر اس طرح‌گنتی کرو گے تو اردو ویسے ہی مختلف زبانوں‌کا مجموعہ ہے اس کا اپنا کون سا ذخیرہ ہے الفاظ‌کا ؟ کہیں‌فارسی ، کہیں‌عربی، کہیں‌ہندی اور کہیں‌انگریزی ، اور ان سب کے مجموعے کو ترکی لفظ ’اردو‘ کہا گیا

سمجھ کر لو متھے کنال دے کے لیکن

مختصر یہ ہے کہ ہر وہ لفظ جو معیاری اردو لغت میں دستیاب ہے وہ اردو کا ہی کہلائے گا

__________________

عبدالقدوس

لیکن انکل محبوب بضد ہیں کہ انگریزی کو اردو میں شامل نہیں کرنا چاہیے اور چاہے کوئی بھی زبان ڈال لو انگریزی نہیں آئے

__________________

میاں شاہد

اس طرح تو پھر صرف انگریزی کیا فارسی اور عربی بھی نکال دو اور پھر یہ اپنی ایک نئی اردو تخلیق کریں جس میں صرف سپیس اور خالی جگہ ہو بٹن دباکے

مطلب یہ ہے کہ بات کسی بنیاد پر ہونی چاہئے جب اردو ہے ہی کئی زبانوں کا مرکب تو اس میں سے کسی ایک کو کس طرح نکال سکتے ہیں پھر تو میں کہ سکتا ہوں‌کہ یہ یا کوئی اور مجھے "گلاس" کی جگہ متابادل لفظ ‌بتادے جسے اردو میں استعمال کیا جاسکے

اور سمجھ کر لو متھے کنال دے کے لیکن کا متبادل بھی

محبوب عالم

جناب ! اِس کا تذکرہ میں پہلے بھی کرچکا ہوں کہ جس زبان کو آپ بین الاقوامی زبان کہتے ہیں یعنی انگریزی وہ بھی تین زبانوں فرانسیسی، لاطینی اور یونانی سے بنی ہے. آپ انگریزی میں سے فرانسیسی، لاطینی اور یونانی کے الفاظ نکال دیجئے پھر آپ مشاہدہ کریں گے کہ یہ بین الاقوامی زبان تو کیا فرنگیوں کی بھی زبان نہیں رہے گی.

کونسی اُردو لُغت کو آپ معیاری کہتے ہیں؟ میرے خیال میں سب سے معیاری اُردو لُغت آکسفرڈ (oxford) کی ہے. بتائیے ابھی تک آپ نے کبھی اُس سے مستفید ہونے کی کوشش کی؟ اور سائنسی الفاظ اُردو لُغات میں اِبتداء سے موجود نہیں ہیں یعنی جب سے اُردو لُغات لکھی جارہی ہیں اُن میں انگریزی ہی کے الفاظ کو بیعنہہ اُردو رسم الخط میں لکھ دیا جاتا ہے، کیا اُن الفاظ کیلئے اُردو متبادل نہیں بنائے جاسکتے؟ اگر انگریزی اپنے سائنسی الفاظ فرانسیسی، لاطینی، اور یونانی سے اخذ کرتی ہے تو کیا اُردو اپنے الفاظ عربی اور فارسی سے اخذ نہیں کرسکتی؟

کسی پر بھی بزور اُردو الفاظ کو لاگو نہیں کیا جاسکتا تاہم اُن کو قائل کرنے کی کوشش کرسکتے ہیں. ابتداء تو کیجئے!

عبدالقدوس

آپ کے الفاظ ہیں

جب ہم عربی اور فارسی سے اخذ کر سکتے ہیں تو انگریزی سے کیوں نہیں؟

کیا ہم یہ سمجھیں کہ سرسید احمد والا دور آگیا ہے کہ جب وہ انگریزی کو بھی ساتھ میں پڑھنے کی ہدایت کرتے تھے تو ان پر کفر کا فتوٰی لگا دیا گیا

عبدالقدوس

اب تک یہ بات صرف میرے دل کو لگی ہے

محبوب عالم

اُردو بول کے بھی اُردو کی اصل رُوح کو نہیں جانتے. اُردو کی اصل مآخذ عربی، فارسی اور سنسکرت ہیں. انگریزی نہیں! ہاں کئی الفاظ ایسے ہیں جن کو استعمال کیا جاسکتا ہے جیسے آپ کا مذکورہ ‘‘گلاس’’. ہم یہاں ایسے چیزوں کی بات نہیں کررہے. بلکہ چوپال پر اُردو کے استعمال کی بات کررہے ہیں. آپ کوشش تو کریں انگریزی کیلئے اُردو متبادل الفاظ ڈھونڈنے کی! آپ نے کوشش ہی نہیں کی اور نہ آپ کرنا چاہتے ہیں. جن الفاظ کا متبادل نہیں ڈھونڈا جاسکتا اُن کا نہ سہی لیکن جن کا متبادل ہے اُن کو تو استعمال کریں.

منتظمین

ویسے تو یہ سوال میں‌بھی پوچھنا چاہ رہا ہوں کہ انگریزی سے بغض کیوں ہے؟ فارسی اور عربی سے اس محبت کی کیا وجہ ہے؟ جب کہ انگریزی کے الفاط عام زندگی میں رواج بھی پا چکے ہیں۔ تو پھر پہیے کو دوبارہ سے کیوں‌ایجاد کیا جائے؟

__________________
تم سپاہی نہیں ہو پیشہ ور قاتلو!

محبوب عالم

پھر وہی بات! اُردو اپنے اصل مآخذ سے الفاظ اخذ کرے گی نا! انگریزی نے کبھی عربی سے سائنسی اصطلاحات اخذ کئے ہیں؟ اور لفظ اخذ کرنے کا بھی ایک طریقہ ہوتا ہے. اِس کا اثر زبان کے دیگر الفاظ پر بھی ہوسکتا ہے. اِس کا تذکرہ میں ‘‘ترتاش’’ کی تفصیل میں کرچکا ہوں.
سرسید احمد خان نے یہ نہیں کہا کہ اُردو میں انگریزی کے متبادل الفاظ مت ڈھونڈو بس وہی انگریزی الفاظ کو ہی اُردو رسم الخط میں لکھتے رہو.
آپ عام اُردو کے استعمال کی بات کرتے ہیں. تو بتائیے : ایک عام آدمی ‘‘ فورم’’ آسانی سے سمجھ سکتا ہے یا ‘‘چوپال’’؟

میاں شاہد

جب ایک زبان کی بنیاد میں انگریزی شامل ہے تو آپ کس اصول پر انگریزی کو اس سے الگ کریں‌گے؟ صرف انگریزی سے نفرت کی بنیاد پر؟ یہ تو بہت عجیب بنیاد ہے، کل کو ہمیں‌ایران سے نفرت ہوگئی تو ہم بھی فارسی کو اردو سے الگ کرنے کی مہم چلاسکتے ہیں اور اسی طرح ۔ ۔ ۔ ۔

پھر کیا کریں گے اور کیا کہیں گے آپ ؟

منتظمین

میرے خیال سے فورم اور چوپال دونوں‌ہم پلہ ہیں لیکن چوپال پنجابی کا لفظ ہے اور دوسری علاقائی زبان دانوں کے لیے اس لفظ میں اتنی کشش اور اہمیت نہیں ہے۔ ترتاش اور لیزر کے مقابلے میں لیزر ایک عام فہم اور اصل سے قریب تر اور مروجہ لفظ ہے۔
میں نے ایک سوال دقیق اور دقیقہ کے بارے میں پوچھا تھا اس کا کوئی جواب نہیں ملا۔

محبوب عالم

جناب! انگریزی سے کوئی بغض نہیں ہے. افسوس صرف اِس بات کا ہے کہ ہمارے ساتھ ہماری زبان بھی مغربیوں کی غلام ہے. کم اَز کم اپنی زبان کو تو غلامی سے چھٹکارا دِلائیے. عربی اور فارسی سے محبت اپنی زبان کی وجہ سے ہے. اگر ہماری زبان فارسی اور عربی سے نہ بنی ہوتی تو آج میں اِس طرح شدّت سے اُن کی اہمیت نہ اُجاگر کررہا ہوتا.
انگریزی کے الفاظ عام زندگی میں اِس لئے رواج پاچکے ہیں کہ ہماری زبان میں اُن کیلئے متبادل نہ ہونے کی وجہ سے ہم اِبتداء ہی سے وہی الفاظ سنتے اور استعمال کرتے آرہے ہیں. اِتنی زیادہ استعمال کی وجہ سے ہم ان الفاظ سے اتنے مانوس ہوچکے ہیں کہ ہمیں وہ الفاظ اپنی زبان کے لگتے ہیں. ایک چینی انگریزی کے بارے میں نہیں جانتا کیونکہ اُس کی زبان میں انگریزی الفاظ کے متبادل موجود ہیں اور وُہ اپنی زبان سے مانوس ہے اِسی لئے اُسے انگریزی عجیب لگتی ہے.

محبوب عالم

جناب آپ یہ کیسے کہہ سکتے ہیں کہ اُردو کی بنیاد میں انگریزی شامل ہے؟ اُردو نے انگریزی سے ایسے ہی الفاظ لئے ہیں جس طرح انگریزی نے سنسکرت سے الفاظ اخذ کئے ہیں. تو آپ یہ کہیں گے کہ انگریزی کی بنیاد میں سنسکرت شامل ہے؟ سب کچھ جانتے ہوئے بھی سب کچھ نظر انداز کرنا چاہتے ہیں آپ. انگریزی سے والہانہ محبت کی وجہ سے؟ اپنی زبان کا کیا ہوگا؟ میں یہ کہہ چکا ہوں کہ جن الفاظ کا متبادل نہ ڈھونڈا یا بنایا جاسکے اُس کو ایسے ہی استعمال کرلینا چاہئیے.

منتظمین

وکی پر ایک instrument کا متبادل پرزہ دیا گیا ہے۔ جب کہ انسٹرومنٹ کبھی بھی پرزہ نہیں ہوتا بلکہ ایک مکمل کام کرنے والا آلہ ہوتا ہے۔ تو کیا وکی دانوں نے آلہ اور پرزہ کا کوئی فرق ملخوظ خاطر نہیں رکھا ہے؟
اگر پرزہ کی بات کریں‌تو اس کے لیے part کا لفظ استعمال کیا جاتا ہے۔ پرزہ ایک آلے کا چھوٹا (ذیلی حصہ) ہوتا ہے جبکہ انسٹرومنٹ کوئی بھی کام کرنے والا ایک مکمل آلہ ہوتا ہے بھائی۔۔۔ کیا اپ کے سمر قندی صاحب اس وضاحت کو قبول کریں گے؟ اور وکی پر تبدیلی کرنے کے لیے راضی ہو جائیں گے؟

سیپ

یہ لیجئے جواب
"منٹ کا اردو متبادل دقیقہ ہے لہذا منٹ کو دقیقہ کہنا علمی (سائنسی) لحاظ سے درست ہو گا۔ چونکہ منٹ زیادہ معروف ہے اس لیے اس مضمون میں دقیقہ کی تفصیل بیان کرتے وقت منٹ کا لفظ بھی استعمال کیا گیا ہے تا کہ پڑھنے اور سمجھنے میں کوئی دشواری نہ ہو۔"

__________________